Kilitu se sa jasa jasa padjil no
8
Se öseshi,
ponto shi se mashi da jö shi no bi ska faa iai no sa ku uan jasa jasa padjil ku se sa nguë shi ska tusan benda dëtu töli Alë liba dösë.
2 Ala se ëli ja fë sulvisu shimafan uan shividölö dantu limada dösë,
limada shishizhu shi ku Shiölö se fë ku na sa ja a fë ku öma nna pöjödölöf.
3 Nna jasa jasa padjil tudu ta pa ja da Nashian uan kuzhu ku saklifisu,
se jasa jasa padjil no ten ta pa ja shivi ku uan kuzhu.
4 Se ja pa sa ja ëli bi sa tela iai,
ñi ëli na bi ske sa padjilf,
pakë të padjil ku ja da amea jö ineñ shi alë Moises ja pindji.
5 Mandji se nna padjil ineñ sai ja shivi dantu limada ku ja sa shimafan uan fesan ku sombolo i shi sa ösë,
amea shi a bi bi da Moises lazhan ta ëli bi ske fë limada:
«Bo ja sa suguladu pa bo fë pa ja kë amea shime ku a bi bi msa bo van iki ai».
6 Mandji se sulvisu padjil shi ku Djisu bi ma se bi sa supiölö mashi ku sulvisu dëneñ,
ku a shime bechi shi ku ëli se ja sa metadji,
se ja sa supiölö mashi ku dji antigu,
pakë ja sa dantu plomesa ineñ shi ja sa gavu mashi.
7 Shi bechi shi pimëlu bi sa shin fata,
na bi ske fë fata pa tan tuka ku i shi ja fë dösu sef.
8 Mandji se Nashian bi bë zhugan fata dantu pövu,
se ëli faa:
«Se Shiölö fala:
Ske bi da djia,
ku amu ske fë uan bechi novu
ku pövu Israel
ku dji Juda.
9 Se bechi se na ske sa shimafan i shi ku amu fë
ku nna paipai namsëdjif
ta amu bi ma öma dëneñ
ku amu chila ineñ fo tela Ejipto.
Ineñ na bi kumpli ku bechi amuf,
se amu lega ineñ pë,
se Shiölö fala.
10 Mandji se bechi sai se sa bechi shi novu ku amu ske fë
ku pövu Israel dantu djia sala.
Amu ske pë alë amu dantu miolo dëneñ,
se amu ske skëvë pë dantu kusan dëneñ.
Se amu ske sa Nashiolo dëneñ,
se ineñ ske sa pövu amu.
11 Se zhugan nguë na tan ske ja shina pusumu dëli jaf,
ñi zhugan nguë na tan ske faa nna namain dëli:
“¡Ja jönsë Shiölö!”,
pakë nguë tudu ske ja jönsë amu,
fo nguë shi kichi ba toja nguë shi ngangandji dantu ineñ.
12 Se amu ske të mindjikodji da ja fëfëiu dëneñ,
se zhugan djia se amu na tan ske lambela pekadu dëneñf».
13 Ta Nashiolo ja faa ja tëjantu ku uan bechi «novu»,
ja da ötëndë fa ëli fë pa i shi pimëlu vla veiu,
ku na tan ja shivif se goleme ske së folo ku supichi.