Melkisedek se sa supiölö ku Abraam
7
Pakë Melkisedek sai,
alë palea Salem,
padjil da Nashian shi Atu mashi,
se ëli së ba ma Abraam jamian ta ëli tan bi ngana dantu pezha ku nna alë,
se ëli da ëli besa.
2 Zha se Abraam ma uan deshi pachi jö ineñ shi ëli bi ngana dantu pezha iai se ëli da Melkisedek.
Namu Melkisedek ja da ötëndë fa sa «alë djustishi»,
ku «alë Salem» ku ja da ötëndë fa sa «alë padji».
3 Na të zhugan ja skividu da kë nguë sa pai ñi main dëli ñi zhugan nna paipai dëlif;
na të jomesadu ñi jabamentu vida dëlif.
Ëli se ja kë Mina Nashiolo,
ontolo ëli sa padjil pa sempele.
4 Namsëdji pia gavu,
ngandji shi Melkisedek ngandji.
Ku ba toja Abraam,
paipai ngangandji Israel,
ku jönsë jö sai öshi ëli da ëli pachi shi fë deshi jö ineñ ëli ngana fo pezha iai.
5 Amea alë Moises,
bi ska pindji pa nna padjil,
ku ineñ tudu sa nna minadjimina Levi,
ineñ bi sa ku mandatu pa ineñ ja ma pagu uan deshi pachi gagavu fo nna pövu,
ku ja sa fa,
fo nna namain,
benga pa ineñ ten ja sa nna minadjimina Abraam.
6 Mandji se,
Melkisedek,
ku na bi sa minadjimina Levif,
se bi ma fo Abraam uan deshi pachi.
Se Melkisedek da Abraam besa,
nguë shi bi ma plomesa Nashiolo bebezha.
7 Se,
amea shi no tudu sëbë,
nguë shi ja të pödë pa da nguë uan besa se ja sa supiölö nguë shi ja ma besa.
8 Nna padjil ineñ shi ja ma pachi shi ja fë uan deshi pachi ja sa napai ku ja mölë,
mandji sa fa Melkisedek se sa supiölö ku ineñ pakë a ja da no lazhan gavu fa ontolo ëli ska bibe.
9 A shime a ja paadji faa nna padjil ku sa nna minadjimina Levi,
nna nguë ineñ shi ma uan pachi shi ja fë deshi,
se ineñ da pagu Melkisedek uan pachi shi ja fë uan deshi ta ëli da Abraam.
10 Se benga zha pa ontolo a na bi sa pali Levif,
shimenchi dëli shi së fo ëli bi sa dantu döguë paipai Abraam bebezha ta Melkisedek bi ma pachi shi ja fë uan deshi.
11 Tadashi,
se shi bi paadji sa dëtu amea jalëla padjil shi ja fo Levi (ku tëjantu dëli se a bi da pövu alë),
¿jama fë tan bi fë fata pa tan pë uan padjil patadu,
amea jalëla Melkisedek ku na ja sa jalëla amea dji Aaronf?
12 Pakë ta ja tuka padjil,
ten ja fë fata pa ten ja tuka alë.
13 Se padjil shi no ska faa ja tëjantu ku ëli sa nguë uan zhenchi patadu,
ku nna nguë dëli zhugan nguë na shivi deenchi datali shimafan padjilf.
14 Jö shi amu ngongo fala sa fa Shiölö no së fo zhenchi Juda,
se Moises zhugan djia na faa nna padjil së fo zhenchi sef.
Djisu sa shimafan Melkisedek
15 Mandji se tuka sai se tan msa gavu mashi,
pakë tan lanta uan padjil patadu,
ku sa shimafan Melkisedek.
16 Se Djisu se ba vla fë padjil,
na sa pakë ëli kumpli alë fo mandamentu pa ëli sa nguë zhenchi nna pöjödölöf,
shina dajantu pödë uan vida ku a na paadji të fea feaf.
17 Pakë tëjantu dëli se a ja da lazhan gavu:
«Bo se sa padjil pa sempele,
amea jalëla Melkisedek».
18 Se mandatu shi antigu a ja chila folo,
pakë bi sa levu ku na tan bi shivif.
19 Dajantu shi ku alë na pë zhugan dëtuf,
mandji se öseshi se no jonfa uan alagada gavu mashi ku dajantu shi se no ska iaba lome Nashiolo.
20 Se na bi sa shin julamentuf,
pakë nna minadjimina Aaron ineñ bi sa padjil shin julamentu,
21 mandji se nguë sai bi sa ku julamentu nguë shi faa ëli:
«Se Shiölö shi fë julamentu,
se ëli na ske tuka mazhna ja dëlif:
“Bo se sa padjil pa sempele”».
22 Se dajantu ku julamentu sai,
se Djisu se sa nguë shi ja sugula bechi shi gavu mashi ku Nashiolo.
23 Bi të uan sapa padjil basu mandatu shi antigu,
pakë mölë na bi ska lega pa ineñ ja be deenchi ku sulvisu dëneñf,
24 mandji se dajantu ku Djisu ja bibe pa sempele,
se padjil dëli ten ja ta pa sempele.
25 Dajantu shi se ëli paadji sava nguë,
uan ope soso ku pa sempele,
nna nguë ineñ shi ja toja Nashiolo amea dëli,
nguë shi ku se ja bibe pa sempele,
valadji pa ëli paadji lezha da Nashiolo dajantu dëneñ.
26 Se Djisu se sa klase jasa jasa padjil shi fë no fata,
pakë ëli sa santu se ëli na të kupa ñi noda pekaduf.
Ëli se a bi safa fo nna pekadölö se a da ëli jamian shi sa ku ondolo mashi liba dösë.
27 Ëli sa patadu ku utu nna jasa jasa padjil,
ëli na sa ku dishamentu pa ëli ja fë saklifisu djia tuduf.
Ineñ bi ja fë saklifisu pimëlu da tuludöguë pekadu dëneñ zha se ineñ ja fë dji pövu iolo.
Mandji se,
Djisu bi fë uan ope soso ku pa sempele ta ëli bi da öguë dëli shimafan saklifisu da pekadu pövu tudu.
28 Alë Moises ja pë nna jasa jasa padjil ku ja sa nna napai levu levu;
mandji se julamentu Nashiolo,
ku se bi bi tashi alë,
se ëli pë jasa jasa padjil a Mina dëli amea julamentu,
se Mina dëli se bi sa jasa jasa padjil shi dëtu pa sempele.