6
Dajantu shi,
pa no ja ska be ku deenchi ba toja pa no sa nna nguë ngangandji,
pa no ja lega pë uan benda ja levu levu ineñ shi a shina no iai tëjantu ku Kilitu.
Pa no na tan ja vlame ba pë fundamentu ineñ sef,
shimafan ta no tan vla ku ope tashi ku ta no lega fidu ja fëfëiu ineñ shi ja ma nguë ba mölë,
ku pa ja të jonfa Nashiolo,
2 ku pa ja shina namsëdji ja mashi tëjantu ku bachizha,
ku pa ja pë öma liba dji nguë,
ku pa ja ten ja lanta nguë fo mölë ku juisio chindadji.
3 Se sa jö shi,
ja sa vintadji Nashiolo,
pa no ske ja be ku deenchi.
4 Pakë na ske paadji saf pa nna nguë ineñ shi uan vëdji bi ma fögö djidjidu,
ku bi puva gagavu ku ja fo Nashiolo ku sa ösë,
se ineñ bi të pachi dantu Spitu Santu,
5 ku ineñ ten bi puva nova gavu Fa Nashiolo ku pödë mundu shi tan ske bi bi,
6 shi ineñ tan ja pono,
se a na tan ja paadji fë ineñ novu valadji pa ineñ tan vla ku ope tashif;
ta ineñ tan ja da tuludöguë dëneñ me pë kusu da Mina Nashiolo se ineñ ja msa ëli ku govan da nguë tudu.
7 Pakë ta san tela ja bëbë aua sëbidu ku ja pono uan sapa ope pë liba dëli shi ja da uan palidu gagavu da nna nguë ineñ shi ja ska tabaia,
ineñ ja të besa fo Nashiolo.
8 Mandji se,
shi ja da pian pian ku alba pian pian na ja shivi da zhugan jaf.
Se a na ske ma tave ta ëli masanfa ku pa ten kamaf.
9 Nna jamada kilidu amu,
benga zha pa no ja faa amea sai,
no na ja këlë fa sa ja tëjantu ku namsëdjif.
No sa suguladu fa namsëdji se ta pa ja të ja gagavu mashi,
ku se sa jö ineñ shi ten ja bi ku savasan.
10 Pakë Nashian sa nguë dëtu.
Se ëli na ske kësë fidu ja namsëdjif ku ngongo ku,
da gloria dëli,
namsëdji ja msa ja shivi utu pövu santu amea se ontolo namsëdji ja ska be ja fë iai.
11 Mandji se dishamentu no sa pa namsëdji ja msa cheche shime ku suguladu ntëlelele da alagada ba toja jabamentu.
12 Tadashi,
pa namsëdji na ja sa pisközhuf,
gavu mashi,
pa namsëdji ja lë zhampulu nna nguë ineñ shi,
ku amea jonfa ku pashiensa dëneñ,
se ineñ ske ma gagavu plomesa.
Plomesa Nashian ja bi ku alagada
13 Ta Nashian bi fë Abraam plomesa,
öshi na tan bi të zhugan nguë supiölö pa ëli jula daf,
se ëli jula da tuludöguë dëli me,
ja faa:
14 «Anta vedadji se amu ske da bo besa,
se amu ske fë pa na paadji jonta nna minadjimina bof».
15 Tadashi se Abraam gada ku pashiensa se ëli ma jö shi Nashian bi bi plomëtë ëli iai.
16 Ta nna pöjödölö ja fë julamentu,
ineñ ja limian uan nguë ku ja supiölö mashi ku ineñ valadji pa ja fë pa ineñ ja kumpli;
se ta ineñ ja fë uan julamentu,
se sa öshi na tan ja të zhugan ja pa ja pufiaf.
17 Dajantu shi se Nashian,
ku bi ngongo msa ntëlelele nna nguë ineñ shi ske të plomesa dëli na ja tukaf,
se ëli ja msa ku uan julamentu.
18 Se amea sai se Nashian fë jö ineñ se dödösu:
plomesa ku julamentu.
Ja dödösu ineñ se na ja paadji tukaf,
pakë na fo fë pa Nashian ja da fanchilaf.
Dajantu shi,
no ineñ shi ba toja ëli ja jua jamian shi pa no jöndë pë,
no paadji sa ku jonfa shi gavu ja fala alagada shi sa deenchi no.
19 Se alagada sai sa uan onjolo suguladu ku jonfadu da alma,
se ja ma no be amea panu sai ba dantu dantu jadji Nashiolo.
20 Djisu lantela ala bebezha dajantu no.
Se ëli se sa jasa jasa padjil pa sempele,
amea jalëla dji Melkisedek.