5
Jasa jasa padjil tudu ja sa nna napai ku a ja ma pa se ja sa jamian utu nna pöjödölö deenchi Nashiolo,
ku valadji pa se ja ma ja gagavu nna pöjödölö ineñ sai ku pa da saklifisu da pekadu dëneñ.
2 Se ëli ja paadji ma pashiensa ku nna nguë buiadu ku nna nguë ineñ së fo jamangandji,
pakë a shime ëli ten ja sa maladu ku ja levu levu ineñ shime.
3 Dajantu shi se ta pa ëli ten ja fë saklifisu da tuludöguë pekadu dëli ku a shime ku dji nna pövu.
4 Zhugan nguë na paadji sa uan jasa padjil pakë ëli ngongo të ondolo sef.
Ta pa Nashian se sama ëli da tabaia sai,
amea shi se pasa ku Aaron.
5 Dajantu shi,
se Kilitu na da tuludöguë dëli ondolo se ja fë ëli me jasa jasa padjilf,
shina sa fa Nashian se ma ëli,
se faa ëli:
«Bo se sa Mina amu.
Ödjai me se amu pali bo».
6 Se dantu utu jamian Nashian ja faa:
«Bo se sa padjil pa sempele,
amea jalëla Melkisedek».
7 *Ta Kilitu ontolo bi sa san tela iai,
ëli bi ska lezha ku ja pindji ku taba fala ngandji ku adöiö da nguë shi ëli bi paadji fë pa sa legadu fo mölë.
Se Nashian bi tëndë lezha dëli dajantu ondolo ngandji shi Kilitu bi sa ku ëli.
8 Benga zha pa ëli bi sa Mina Nashiolo,
Kilitu bi shina tëndë kuzhu da jö ineñ shi ëli padësë.
9 Dajantu shi,
se Nashian fë pa ëli se vla fë jasa jasa padjil shi dëtu,
se Kilitu vla fë nguë shi sa ku savasan chindadji jomesa fo da nna nguë ineñ shi ja tëndë ëli tudu.
10 Se Nashian sama ëli pa ëli sa jasa jasa padjil amea jalëla Melkisedek.
Uan sama pa ja këësë dantu jonfa
11 No sa ku vintadji pa no faa namsëdji uan sapa kuzhu tëjantu ku jö sai,
mandji se ja kuta uan sapa pa no da namsëdji ötëndë,
mashi ku namsëdji tan sa nna nguë na ja tëndë ja spitu gavuf se vlame tan kë ja namsëdji na ja paadji tëndëf.
12 *Sa tempu löngö zha ku pa namsëdji ta pa ja sa nna meeth,
mandji se,
ja fë fata pa uan nguë tan ja vlame shina namsëdji ja levu levu mashi dantu vedadji fala Nashiolo.
Se namsëdji sa shimafan nna mina kichi kichi ku ja fë ineñ fata aua mama döböiö,
ku na ja paadji kumu manchimentu lizhuf.
13 Pakë nguë shi ontolo ja bëbë aua mama döböiö ontolo ëli sa mina mongo mongo se ontolo ëli na sëbë monova djustishif.
14 Manchimentu lizhu sa ja nna nguë ngangandji,
nna nguë ku foshi fidu ja dëneñ se ineñ ja sa jotadu pa ineñ ja sëbë jö shi sa uan ja gavu fo uan ja fëiu.