Djiskansa Nashiolo
4
No ja ska pinchidu,
pakë,
benga pa plomesa shi pa lantela dantu djiskansa dëli iai ontolo bi sa;
dajantu shi,
zhugan namsëdji na ske paadji ba da jabamentuf.
2 Pakë nova gavu sai,
da djiskansa shi Nashian bi fë vadu pë iai,
se a ja da ineñ nova sai amea shi a ten da no,
mandji se na bi shivi da ineñ zhugan jaf pakë ineñ na bi sa ku jonfa shi nna nguë ineñ shi bi tëndë Nashiolo bi bi faa ineñf.
3 Pakë no ineñ shi këlë iai moso se ske paadji lantela dantu djiskansa,
amea shi ku ëli fala:
«Dajantu shi,
se amu jula dantu pashian amu:
“Jabötu ineñ na ske lantela dantu djiskansa amuf”».
Anta vedadji fa fidu tabaia dëli jaba fo djia shi a mindji mundu.
4 Pakë dantu uan jamian ja faa ja tëjantu ku djia shi ja fë seta:
«Se djia shi fë djia seta se Nashian djiskansa ku fidu ja dëli tudu».
5 Mandji se utu jamian dantu Fa Nashiolo ja faa:
«Jabötu ineñ na ske lantela dantu djiskansa amuf».
6 Mandji se djiskansa Nashiolo sa pa nna nguë ineñ shi ja lantela,
mandji se nna pimëlu pimëlu ku tëndë nova gavu sai na lantelaf,
pakë ineñ na tëndë Nashianf.
7 Tadashi se Nashian tan vlame ma uan djia,
ku sa ödjai,
ta tempu baezha amea alë David dantu fala ku a bi faa bebezha:
«Ödjai ta namsëdji ja tëndë fala dëli,
na ja të kusan namsëdji të vla öduf».
8 Pakë shi Josue bi bi paadji da ineñ djiskansa sai,
Nashian na tan bi ske faa utu djasubudu tan ske bi bif.
9 Mandji se ontolo të uan pachi djiskansa patadu ku ske sa gadadu da pövu Nashiolo.
10 Pakë nna nguë ineñ shi lantela dantu djiskansa Nashiolo,
se ineñ ten ske djiskansa fo fidu ja dëneñ,
amea shi ku Nashian ten ske djiskansa fo dji dëli.
11 Tadashi,
no fë jö ineñ shi no paadji tudu valadji pa no lantela dantu djiskansa sai,
mandji se shi no na ja tëndë Nashianf,
amea shi nna nguë ineñ se na ja tëndë ëlif.
12 Pakë Fa Nashian sa vivu se të pödë.
Se ja sa jotadu mashi ku uan jatana öiö dösu,
se ja lantela dantu alma ku spitu,
dantu zhuntu zhuntu ku fisu fisu oso.
Se ja juzhga mazhnamentu ku dishamentu jöndjidu fo dantu kusan.
13 Se na të zhugan jö ineñ shi a mindji mundu se ku ja sa jöndjidu da Nashianf.
Ja tudu ja sa gödödji se ten ja sa betu deenchi öiö dëli;
se ëli se no ske da lazhan ja tudu.
Kilitu se sa jasa jasa padjil shi dëtu
14 Se dajantu shi,
öshi no sa ku uan taba jasa jasa padjil ku se lantela ösë,
Djisu Mina Nashiolo,
no ja fala lizhu jonfa se no këlë iai.
15 Jasa jasa padjil no ja tëndë flakëzha no,
pakë ëli ten bi pasa puva ineñ se tudu ku klase tentasan ineñ shi no ten ja ska pasa,
mandji se ëli jabötu na fë pekaduf.
16 Dajantu shi no ja iabi töli galasa Nashian no ku valëntë tudu.
Ala se no ske të mindjikodji dëli ku pa no ten ma galasa shi ske zhuda no ta tan ske ja fë no fata mashi.