Djisu se sa supiölö ku Moises
3
Dajantu shi,
nna namain kilidu amu,
namsëdji sa ja nna nguë Djisu se namsëdji ja të pachi ku nna nguë ineñ shi a sama ba ösë,
pa namsëdji ja mazhna amea shi gavu fa Djisu sai se sa apostol ku jasa jasa padjil.
2 Pakë ëli ja sa jonfadu ku Nashiolo,
ku se sama ëli,
amea shi ku Moises ten bi sa jonfadu ku sulvisu da jadji Nashian tudu.
3 Mandji se Djisu se mësë gloria mashi ku Moises,
amea shi ku nguë shi ja fë uan jadji se a da ondolo mashi ku tuludöguë jadji.
4 Pakë jadji tudu ja sa ku uan nguë ku se ja fë,
mandji se Nashian se ja fë ja tudu.
5 Anta vedadji Moises bi sa shimafan uan shividölö jonfadu dantu jadji Nashiolo.
Tabaia dëli bi sa pa ëli msa vedadji ineñ shi Nashian bi ske da pa jönsë tempu shi tan ske bi bi.
6 Mandji se Kilitu,
ku sa Mina,
ëli se sa liba jadji Nashian tudu,
se no sa nna nguë jadji Nashiolo,
shi no ja mdja suguladu ku liguilia dantu jonfa sai ku alagada no ku Kilitu.
7 Dajantu shi,
amea shi Spitu Santu ja faa:
«Shi namsëdji ja tëndë fala dëli ödjai,
8 na ja të kusan namsëdji të vla öduf,
shimafan amea shi bi shiga ta ineñ bi lanta pedji,
ta bi da djia puva dantu jamian sölö sölö.
9 Ala se nna paipai dëneñ fë amu tentasan se ineñ puva pashiensa amu,
benga zha pa ineñ bi bë tabaia amu dantu deshi danu jatulu.
10 Dajantu shi se ja mëtë amu pashian ku zhenchi sai,
amu faa ineñ:
“Olatuvëdji ineñ ja sa uali dantu kusan dëneñ.
Se ineñ na ja ngongo fë jö shi amu ja faa ineñf”.
11 Dajantu shi,
se amu jula dantu pashian amu:
“Jabötu ineñ na ske lantela dantu djiskansa amuf”».
12 Dajantu shi,
nna namain,
¡ja ska pinchidu!
Namsëdji ja sa suguladu pa zhugan namsëdji na ja sa ku uan kusan fëiufa ku na ja këlëf pa ja safa ineñ ba löndji fo Nashian shi sa vivuf.
13 Tan ja sa gavu mashi,
pa namsëdji ja ska da uan nguë ku utu nguë añimu,
öshi ontolo ja sa «ödjai» valadji pa na ja ngaña zhugan nguë dajantu pekadufa ku pa ja të kusan dëli të öduf.
14 Pakë,
shi no ja sa nna nguë jonfadu ba toja jabamentu,
ja ska jonfa Nashiolo ku amea foshi shime ku bi sa ku no fo jomesadu,
ta no bi këlë dëli,
pa se sa öshi no të pachi jö ineñ shi ja sa ja Kilitu tudu.
15 Ta ontolo a ja ska faa:
«Shi namsëdji ja tëndë fala dëli ödjai,
na ja të kusan namsëdji të vla öduf,
amea shi bi shiga ta ineñ bi lanta pedji».
16 ¿Se kë nna nguë ineñ shi bi tëndë,
ku tan lanta pedji tëjantu ku ëli?
¿Na bi sa nna nguë ineñ shi së fo Ejipto ku öma Moises ua?
17 ¿Se ku kë nna nguë fë ja pa mëtë Nashian pashian dantu deshi danu jatulu?
¿Na bi sa ku nna nguë ineñ shi fë pekadufa,
ku mochi dëneñ bi pono pë dantu jamian sölö sölö ua?
18 ¿Se kë nna nguë Nashian bi ska jula fa jabötu ineñ na ske lantela dantu djiskansa dëlif,
shina nna nguë ineñ shi na tëndë ëlif ua?
19 Se no bë fa ineñ na bi paadji lantelaf dajantu fata këlë dëneñ.