Ata ku savasan
2
Dajantu shi se ta pa no ja ska pinchidu vedadji ineñ shi no ja ska tëndë iai,
pa no na ja safa fo ineñf.
2 Pakë nova ineñ shi Nashian da bi ku nna anzhu iai ontolo sa dëtu olatuvëdji,
se nna nguë ineñ shi ja kabela alë ku na ja tëndë ëlif tudu ske të jatigu ineñ shi ku ineñ mësë.
3 Tadashi,
¿kë amea shi no ske paadji jölë,
shi no na ja fë lazhan uan savasan ngandji shif?
Savasan sai sa ja ku tuludöguë Shiölö se bi da lazhan pimëlu pimëlu zha se nna nguë ineñ shi tëndë iai lega no sëbë.
4 A shime,
se Nashian sugula nova sai amea uan sapa shinali,
ja fumözhö fumözhö,
fidu ja ngangandji ku ja gagavu fo Spitu Santu amea vintadji dëli.
Djisu ku savasan nna namain dëli
5 Nashian na pë nna anzhu pa sa nna nguë ineñ shi ske juzhga mundu,
se no ska da lazhan ief.
6 Mandji se uan nguë da lazhan gavu dantu uan jamian,
ja faa:
«¿Kë ja pöjödölö sa,
pa jasa bo ja da ëli,
ö mina pöjödölö pa bo ja sa tave dëli?
7 Bo fë ëli uan fi ja kichi mashi ku nna anzhu
se bo pë ineñ jölöiö gloria ku ondolo.
8 Se bo da ëli pödë liba fidu ja öma bo tudu».
Se öseshi,
ta a ja faa «ja tudu»,
ja da ötëndë fa zhugan ja na mdja öluiaf,
mandji se bi toja öseshi no na sa bë fa ja tudu sa basu pödë dëlif.
9 Mandji se jö shi no ja bë sa Djisu,
ku se a da uan jamian «uan fi ja mashi ku nna anzhu»;
ku sa dajantu ku ëli padësë ku ëli mölë dajantu no,
se öseshi se ëli sa ku «jölöiö gloria ku ondolo».
Sa dajantu,
galasa Nashiolo,
se Djisu jönsë mölë da gavu nna nguë tudu.
10 Se Nashiolo,
ku dajantu dëli ku amea dëli se a fë ja tudu,
se ëli ma uan sapa nna mina dëli pa të pachi gloria dëli.
Se dajantu shi,
se Nashian,
amea padësë,
se ëli bi ta pa fë Djisu nguë shi dëtu ku a ja ska lë,
amea padësë,
valadji pa ma ineñ ba savasan.
11 Dajantu shi,
se Djisu ku nna nguë ineñ shi ku ëli ja fë santu ja sa ku Pai shime.
Se dajantu shi,
se Djisu na të govan pa ëli sama ineñ nna namain dëlif,
12 pakë ëli bi faa Nashian:
«Amu ske da nna namain amu lazhan namu bo.
Dantu pövu zhuntadu bo se amu ske alaba bo».
13 A shime ëli ten faa:
«Amu ske pë jonfa amu liba dëli»,
ku sa fa,
«amu ku nna mina ineñ shi Nashian da amu».
14 Se dajantu shi,
se fë ku nna mina tudu sa nna pöjödölö,
fidu ku jañi ku sangui,
se fë ku a ten ma pachi fo jö shime.
Pakë dajantu ku ëli sa shimafan uan pöjödölö se ëli bi paadji mölë se ku mölë moso se ëli bi ske paadji të pödë djiabu të fea fea.
15 Pakë fo amea se moso se Mina Nashiolo bi ske paadji fë pa nna nguë ineñ shi tudu bi sa sëlëva vida dëneñ tudu dajantu mendu mölë vla fë legadu.
16 Pakë,
anta vedadji,
no ten sëbë fa Mina Nashian na bi dajantu pa ëli bi zhuda nna anzhuf,
shina ëli bi pa ëli bi zhuda nna minadjimina Abraam.
17 Dajantu shi,
se bi fë fata pa ku sinchidu tudu pa ëli bi vla fë shimafan no,
nna namain dëli,
valadji pa ëli se vla fë jasa jasa padjil jonfadu ku mindjikodji,
ja shivi Nashiolo.
Tadashi pa ëli paadji fë uan saklifisu ku ske bi paadji chila pekadu pövu.
18 Se dajantu ku ëli me bi padësë se ëli pasa tentasan,
se ëli të pödë valadji pa ëli zhuda nna ineñ shi ska pasa tentasan.