EPISTOLA DA NNA NGUË
EBREO
Djisukilitu se sa Mina Nashiolo
1
Fo tempu löngö,
se Nashian faa uan sapa vëdji ku amea pata patadu ku nna paipai no amea nna pantafala.
2 Se öseshi,
dantu jabamentu djia ineñ sai,
se ëli faa ku no amea Mina dëli.
Nashian plomëtë ja tudu a Mina dëli shimafan ja gagavu ineñ sai,
amea Mina,
se ëli mindji mundu.
3 Se Mina sai,
se ja msa chila blin gloria Nashiolo,
se sa fesan shishizhu jö shi ëli sa,
se ëli se ja gaga ja tudu ku fala pödë dëli.
Se ta ëli limpa pekadu tudu jaba,
se ëli tusan benda dëtu Alë liba van dösë.
4 Se jö sai ja msa fa ëli se sa supiölö nna anzhu,
dajantu ku a da ëli namu shi fumözhö mashi ku dji ineñ.
Mina se sa supiölö nna anzhu
5 Pakë,
¿a kë anzhu shi Nashian faa jabötu:
«Bo se sa Mina amu.
Ödjai me se amu pali bo»?
Se a tan vlame faa ëli:
«Amu ske sa Pai bo,
se ëli ske sa Mina amu».
6 Vlame,
ta ëli ma Mina Pimëlu dëli bi mundu,
se Nashian faa:
«Pa nna anzhu Nashiolo tudu ja adola ëli».
7 Mandji se tëjantu ku nna anzhu,
se Nashian faa:
«Ëli ja da nna anzhu dëli bi shimafan oventu,
se ku nna shividölö dëli shimafan bazha fögö».
8 Mandji se ëli ja faa Mina.
«Töli bo,
ö Nashiola,
se ja sa olatuvëdji pa sempele.
Bo ja sa gövöndölö ku djustishi.
9 Bo ja ngongo ku djustishi se bo ja të pashian ja fëfëiu.
Dajantu shi,
ö Nashiola,
Nashian bo,
se ëli ja ma bo.
Se ëli ja bolo bo ku zhëitë liguilia,
se ëli ja pë liba bo mashi ku utu nna jamada bo».
10 Se a shime ëli ten fa Mina:
«Shiöla,
fo jomesadu se bo ta fundamentu tela,
se ku öma bo se bo fë ösë.
11 Ineñ ske chama sa,
mandji se bo ske sa pa sempele.
Ineñ tudu ske veiu shimafan bitidu.
12 Se bo ske duba ineñ shimafan uan bobolonda,
se bo ske tuka ineñ shimafan uan bitidu.
Mandji se bo ja sa nguë shime;
se anu bo na ske jabaf».
13 Vlame,
¿a kë nna anzhu shi Nashian faa jabötu?
«Tusan benda dëtu amu,
ba toja pa amu pë nna namigu bo
basu dope bo».
14 ¿Na ja sa nna anzhu tudu spitu pa ja sa shividölö sulvisu dösë ua,
ku a ja da ineñ bi valadji pa ineñ ja zhuda nna nguë ineñ ske të gagavu savasan ua?