Jaata sai ja jomesa ja da lazhan suguladu fa Nashiolo olatuvëdji bi ska jua amea shi pa ëli da lazhan ku mundu nguintëlu nguintëlu, se ta da jabamentu «se ëli faa ku no amea Mina dëli», Djisukilitu (1:2). Dantu lavulu sai a ja msa fo Antigu Testamentu fa Djisu se sa supiölö nna anzhu (1:4–2:9), supiölö Moises (3:3), supiölö Josue (4:8), supiölö Aaron, jasa jasa nna padjil (5:1-10; 7:20–8:6), se ëli sa supiölö bechi shi antigu (8:7-13). Vlame, Djisu se sa supiölö saklifisu tudu pakë ëli ja da Nashian uan ponodu saklifisu pa sempele, se amea sai se ëli ja pada no pekadu no tudu (10:12).

Zha se ta ëli pë Djisukilitu supiölö liba ja tudu jaba, se skëvëdölö lavulu sai ja da zhugan shina ja gavu tëjantu ku vida kitan. Se dantu ineñ tudu, i shi ngandji mashi dantu lavulu sai sa pa ja jonfa Nashiolo. Se tëjantu ku jö sai, se ëli faa fa, Jonfa Nashiolo sa ta a ja sa suguladu ntëlelele fa uan nguë ske të jö shi ëli ska gada. Sa ta a ja sa suguladu fa a ske të uan kuzhu, benga pa no na ja paadji bëf (11:1). Se öshi öshi, se ëli ten ja msa soia nna pai tudu ku nna naamain ineñ shi ku olatuvëdji bi ja jonfa Nashiolo, benga pa ineñ na bi sa ma jö ineñ shi Nashiolo bi plomëtë ineñf (11:4-39).

Fo jomesadu se a ja bë fa, skëvëdölö lavulu sai jönsë Antigu Testamentu. Amea faa fala fumözhö ku finchidu dëli se a ja bë, se olatuvëdji se ëli ja da lazhan fidu ja Djisukilitu ntëlelele. Se jö sai a ja bë bababa amea shi libadë libadë ëli ja faa uan palavulu «uan ope soso ku pa sempele» (7:27; 9:12, 26; 10:10). Ëli ja jaba jaata sai ja da nna namain ineñ shi sa nna nguë pövu santu Nashiolo tudu manten (13:24).