EPISTOLA KU SAN PELAVÖL SKËVË DA
FILEMON
Manten
1
Pelavöl,
djilima tëjantu ku Kilitu Djisu,
ku namain no Timoteo da Filemon manten,
jamada tabaia kilidu no,
2 *ku nna nguë guëzha ineñ shi ku ja zhunta dantu jadji bo,
ku a shime ku namain naamain no Apia ku namain no Arkipo,
jamada pezha no.
3 Pa Nashian Pai no ku Shiölö Djisukilitu ta galasa ku padji dëneñ pë liba namsëdji.
Pelavöl ska lezha da Filemon
4 Amu ja da Nashian dezhupaga olatuvëdji ta amu ja lambela bo dantu lezha amu,
5 pakë amu tëndë monova ngongo ku jonfa shi sa ku bo ku Shiölö Djisu ku ten da nna nguë ineñ shi sa nna nguë pövu santu tudu.
6 Se amu pindji Nashian pa jamada se bo të dantu jonfa sai se ma bo ba jönsë ja gavu ineñ shi no ja fo fë tudu dajantu ngongo shi sa ku no ku Kilitu.
7 Amu sa ku uan liguilia ku añimu monchi dajantu ngongo shi sa ku bo,
pakë bo,
namain amu,
se fia kusan nna pövu santu.
Pelavöl ska pindji da Onesimo
8 Dajantu shi,
se benga zha pa amu sa ku añimu monchi ku namu Kilitu,
pa amu da bo odji jö ineñ shi ske ta pa bo fë,
9 mandji se amu bë gavu mashi pa amu luga bo ku ngongo.
Amu,
Pelavöl,
pai veiu bebezha,
öseshi,
vlame ku amu sa djilima tëjantu ku Kilitu Djisu,
10 *amu luga bo dajantu mina amu Onesimo,
ku amea jonfa no,
dantu djili iai amu sa shimafan pai dëli.
11 Tempu baezha,
Onesimo bi sa uan sëlëva ku na bi shivi bof,
mandji se öseshi se ëli ske shivi no,
bo ku a shime amu.
12 Amu tan ska vlame da ëli bi da bo:
bo ja ma ëli,
shimafan ja bo ska ma tuludöguë amu.
13 Amu bi ngongo pa ëli mdja iai ku amu,
valadji pa ëli shivi amu ku namu bo öseshi ku amu sa dantu djili iai tëjantu ku evanjelio.
14 Mandji se amu na ngongo fë zhugan ja a sondji bof,
valadji pa pulusensa se bo ska fë amu iai na sa afoshifa shina fo vintadji bo.
15 Pakë jativie iai Onesimo bi safa fo bo da uan tempu valadji pa öseshi pa bo sa ku ëli pa sempele,
16 ëli na tan sa shimafan uan sëlëvaf,
shina mashi ku uan sëlëva:
ëli sa shimafan uan namain bo kilidu.
Amu ngongo ku ëli monchi,
mandji se amu sëbë fa bo ske ngongo ku ëli mashi,
na sa ku kusan mosofa shina shimafan uan namain bo dantu Shiölö.
17 Se fë ku,
shi bo ja ska pia amu shimafan uan jamada bo,
amu pindji bo pa bo ma ëli shimafan ja bo ska ma tuludöguë amu.
18 Shi ëli ten ja fë bo uan ja fëiu,
ö shi ëli fala bo uan kuzhu,
bo ja ma fo pachi amu.
19 Amu,
Pelavöl,
amu ska skëvë ku öma amu:
«amu ske da bo pagu bo».
Valadji pa amu na faa bo pa bo pë pachi amuf,
pakë tuludöguë bo,
bo ten fala amu jö shi bo sa.
20 Shiën,
namain amu,
amu pindji anta pulusensa dajantu ngongo Shiölö no,
pa bo fia amu kusan shimafan uan namain bo fo Kilitu.
21 Amu ska skëvë da bo pakë amu sa suguladu fa bo ske tëndë amu,
se amu sëbë fa bo ske fë mashi ku jö shi amu ska pindji bo.
22 A shime,
bo ten ja vlame fë vadu uan jamian da amu,
pakë amu ska gada pa,
Nashian kundji lezha namsëdji valadji pa amu fo ba bë namsëdji.
Jabamentu manten Pelavöl
23 *Epafras,
jamada djili amu dajantu Kilitu Djisu,
da manten bi da bo,
24 *a shime Marko,
Aristarko,
Demas ku Lukas,
ineñ sa jamada tabaia amu.
25 Pa galasa Shiölö Djisukilitu sa liba spitu namsëdji.
Amen.