Jaata Pelavöl skëvë da Filemon, se sa jaata dëli shi kutu mashi ku tudu, sa uan jaata dondolo dantu lavulu nna kitan antigu. Dantu dëli benga zha pa apostol na bi ngongo da lazhan shina kuzhu ineñ shi ödu öduf, ëli ja msa amea shi a ja paadji bibe gavu ku jö ineñ shi ja da ötëndë da ëli ta a ja ma jonfa Djisu ku a ja pachi öguë dëli.

Sinchidu jaata sai, amea shi a ja paadji tëndë fo tuludöguë dëli me, sa i sai: Onesimo, ku bi sa sëlëva Filemon, ëli bi futa uan kuzhu, se jö sai se fë ku ëli jölë fo jadji dëli. Se amea sai se ëli dajonta ku Pelavöl, ku bi sa dantu djili, se ëli zhuda ëli ku sulvisu dëli. Se amea pegua Pelavöl, se Onesimo vla kitan (10), mandji se benga zha pa sulvisu dëli bi fë Pelavöl fata (11), se ëli sinchi pa Onesimo tan vla ba toja Filemon ku se bi sa shiölö dëli, amea shi sa skividu dantu alë nna nguë roma. Ta ëli ma jaata sai ba da shiölö dëli, ëli bi paadji gada pa ma ëli ku liguilia, pakë a shime Filemon ten bi vla kitan fo pegua Pelavöl.

Dantu jaata sai Pelavöl, bi pindji Filemon pa ëli ma Onesimo öseshi, pa na sa shimafan uan sëlëvafa, shina shimafan uan namain kilidu ku Kilitu (15-16). Jaata sai na ja faa pa chila sëlëva folof, mandji ëli ja msa amea shi a ja paadji bla kusan nna nguë mundu sai: Kilitu se sa namain napai shi ngangandji mundu sai tudu, shinke ëli sa tave jaata pata patadu dantu vida sai.

Namu Onesimo dantu fala griego: sa «fë fata», se dji Filemon sa «ngongodu». Se fë ku Pelavöl tan kë ja ëli ja ngongo faa Filemon shi ëli ja sa kitan, ske ta pa ëli da namu dëli ondolo (16, 20), se ëli ten ja gada pa Onesimo ten ja da namu dëli ondolo (11).