Jö ineñ shi nna namain tudu ta pa ja fë
3
Bo ja lambela ineñ pa ineñ ja sa basu nna gövöndölö ku nna jasa jasa tela,
pa ineñ ja tëndë ineñ ku pa olatuvëdji pa ineñ ja sa plesteñi pa ineñ ja fë ja gagavu.
2 Pa ineñ na ja da fëiu dji nguëf,
pa ineñ ja sa nguë ja jua padji ku ja sa nguë ja da nguë ondolo,
ja ska msa kusan masu ku nna nguë tudu.
3 Pakë tudjia a shime no ten bi sa nna nguë shin shizhu,
subebu,
buiadu,
se no ten bi sa sëlëva klase dishamentu ku liguilia fëfëiu tudu,
se no ten bi ska bibe dantu masan ku pashian,
ja të pashian no no me ku dishamentu fëfëiu.
4 Mandji:
«Se ta Nashian ku se sa Savadölö no msa gavu dëli ku ngongo dëli ku mundu nguintëlu nguintëlu,
5 se,
shinke no fë zhugan ja dëtu,
se dajantu mindjikodji dëli se ëli sava no ja laba no se ëli ten limpa no,
se ëli da no uan vida novu amea Spitu Santu.
6 Pakë amea Djisukilitu Savadölö no se ëli da no Spitu Santu monchi mashi,
7 valadji pa,
ta ëli ja fë no dëtu dajantu galasa dëli,
no ja paadji të alagada pa no ten të vida chindadji».
8 Vedadji jonfadu,
se fë amu ngongo pa faa jö ineñ se libadë libadë monchi,
valadji pa nna nguë ineñ shi ja këlë Nashiolo ja jua amea shi pa ineñ fë ja gagavu.
Jö ineñ se tudu sa ja gagavu ku ja fë fata da nguë tudu.
9 Mandji se na ja sa tave lazhan dana danaduf,
soia ineñ shi ja tëjantu ku nna paipai no,
ku tavadji ineñ shi ten ja tëjantu ku alë Moises.
Jö ineñ se tudu sa ja dana danadu shin sinchidu.
10 Shi uan nguë ja ska të guëzha të baga fë uachi,
bo ja sama ëli se bo ja faa ku ëli uan ope se i shi ja fë dösu,
mandji se shi ëli na ja tëndë bof,
se bo ja chila ëli fo guëzha.
11 Ske ta pa bo sëbë fa tili nguë se sa buia bebezha ku pekadu,
se pekadu dëli me,
se ska kondena ëli.
Jabamentu lazhan dadu
12 *Ta amu ja manda Artemas ö Tikiko ba da bo,
bo ja fë ja tudu pa bo bi toja amu dandjian loso Nikopolis,
pakë ala se amu mazhna pa amu pasa tendaua.
13 *Bo ja zhuda ku jö ineñ shi bo ja paadji tudu ku masebu djustishi shi a ja sama ëli Sena ku Apolos,
valadji pa na fë ineñ fata zhugan ja vadji dëneñf.
14 Ku a shime pa nna nguë no ten ja shina fë fidu ja gagavu ku pa ineñ ja zhuda ta ja të dishamentu,
valadji pa ineñ na ja të uan vida fölif.
15 Nna nguë ineñ shi sa iai ku amu tudu da manten bi da bo.
Da nna jamada kilidu no dantu jonfa tudu manten.
Pa galasa Nashian sa ku namsëdji tudu.
Amen.