Jö shi ta pa ja shina nguë
2
Mandji se jö ineñ shi bo ja ska fala olatuvëdji ja sa jö shime ku ja gagavu ineñ shi bo ja ska shina nguë.
2 Nna napai veiu ta pa sa nna nguë jodadu,
nna nguë dondolo ku jodadu,
ku ja sa gavu dantu jonfa,
ku dantu ngongo ku ja paadji gaga mavida.
3 Se sa amea shime ku nna main veiu ske ja fë ja gagavu deenchi Nashiolo,
pa ineñ na ja sa nna nguë mucha da nguëf,
ñi pa ineñ na ja sa sëlëva bëbë vian monchif.
Ta pa ineñ ja shina ja gagavu,
4 pa ineñ ja shina nna mashivin naamain pa ineñ ja ngongo ku medu dëneñ ku nna mina dëneñ,
5 ku pa ineñ ja ska fë ja nna nguë jodadu ku limpi,
ja gada öguë dëneñ,
ja ska fë lazhan jadji dëneñ,
pa ineñ ja sa nna nguë gavu,
ja tëndë medu dëneñ,
valadji pa zhugan nguë na fo faa ja zhogoveadu da nova Nashianf.
6 A shime ten da nna mashivin shizhu valadji pa ineñ ja sa jodadu.
7 Pa bo ja ska msa ineñ zhampulu fidu ja gagavu.
Ta pa bo ja ska shina ineñ kuzhu,
ja msa ineñ jö ineñ shi sa ja dondolo ku dëtu,
8 pa bo ja ska faa fala gagavu valadji pa zhugan nguë na ja paadji tuvaf.
Pa amea sai pa ja fë pa nna namigu no ja pasa govan,
ku pa ineñ na ja sa ku zhugan ja fëiu pa ineñ ja fala tëjantu ku nof.
9 Ja da nna shividölö shizhu valadji pa ineñ ja sëbë sa basu nna shiölö dëneñ,
pa ineñ ja sa nna nguë gagavu ku pa ineñ na ja sa nguë pufiaf.
10 Pa ineñ na ja ska futa fia fiaf,
shina pa ineñ ja sa nna nguë jonfadu,
valadji pa ineñ ja msa amea ja fumözhö shi a ja ska shina nguë tëjantu ku Nashiolo shi sa Savadölö no.
11 Pakë Nashian msa galasa dëli valadji pa ëli sava nna nguë mundu nguintëlu nguintëlu,
12 ja ska shina no fa,
pa no ja naga fidu ja guëzha fëfëiu ku dishamentu mundu sai.
Pa amea sai pa no ja paadji bibe mundu sai ja domina tuludöguë dishamentu,
dëtu ku fidu ja guëzha,
13 ja dishia pa djia ngandji shi no sa ku besa alagada iai shiga:
djia shi Nashian no shi ngandji mashi ku Savadölö Djisukilitu tan ske vlame bi ku gloria dëli.
14 *Nguë shi da öguë dëli dajantu no valadji pa ëli chila no fo ja fëfëiu no tudu ku pa ëli ten limpa no ntëlelele,
pa ëli fë no uan pövu ku ëli ma da öguë dëli,
ku ja të dishamentu ngangandji pa ja fë fidu ja gagavu.
15 Jö sai se sa jö shi ta pa bo ja shina nguë,
ja da ineñ añimu ku ten ja msa ineñ ku odji tudu,
pa bo na ja lega pa zhugan nguë shi na ja da bo ondolof.