EPISTOLA KU SAN PELAVÖL SKËVË DA
TITÖ
Manten
1
Jaata Pelavöl,
shividölö Nashiolo,
apostol Djisukilitu,
ku ëli se a da ëli ba da nna nguë ineñ shi ku Nashian se ma,
valadji pa ineñ ba jonfa ëli ku tëndëmentu vedadji ku amea adola Nashiolo shishizhu,
2 ku ja sa gadadu da vida chindadji.
Ku Nashian,
ku na ja da fanchilaf,
plomëtë vida se fo jomesadu tompu tompu,
3 se öseshi,
ta tempu ja da se ëli msa nova dëli amea pegua ku a jonfa amu fo mandatu Nashiolo ku sa Savadölö no.
4 *Amu ska skëvë da bo,
Titö,
ku sa uan mina amu shishizhu amea jonfa shi sa ku no dödösu.
Pa Nashian shi sa Pai no ku Kilitu Djisu ku sa Savadölö no da bo galasa ku padji.
Amea shi ta pa nna jasa jasa guëzha ja ta
5 Amu lega bo pë liba ië Kreta,
valadji pa bo jözhë jö ineñ shi ontolo bi fë fata pa jözhë pë ku pa bo ten sama nna jasa jasa guëzha,
amea shi amu bi da bo odji.
6 *Uan nna nguë jasa jasa shividölö ske ta pa ëli bibe uan vida shin kupa,
medu uan mooso soso,
pa nna mina dëli tudu ja këlë Djisu ku pa na ja faa ja fëfëiu tëjantu ku ineñfa ku pa ineñ ja fë ja gagavu ku ja tëndë pai dëneñ.
7 Pakë sa gavu pa obispu ja sa ku jalga sulvisu Nashiolo,
ja të uan vida shin kupa,
shin zhugan ja fëfëiu,
pa ëli na ja sa subebuf,
pa ja na ja mëtë pashianf,
pa ëli na ja sa uan bedadölöf,
pa ëli na sa uan nguë buku bukuf,
ñi pa ëli na sa uan nguë leva jafa ñi pa ëli na ja jua djiëlu amea fëiuf.
8 Shina pa ëli ja sa uan nguë ja ma nguë jadji dëli,
pa ëli ja ngongo ku fidu ja gagavu,
pa ëli ja sa ku shizhu gavu,
dëtu,
pa ëli ja fë ja santu ku pa ëli ja sa nguë dondolo.
9 Ta pa ëli ja sa uan nguë ja gada vedadji jonfadu,
amea shi a shina ëli,
valadji pa ëli ten ja paadji da utu nguë añimu ku pa ëli ten ja shina ineñ jö ineñ shi gavu ku pa ëli ten ja jönsë amea shi pa ëli ja da lazhan ku nna nguë ineñ shi ja ska ma nguë be dovesa.
Deenchi nna meeth ineñ shi ja da fanchila
10 Pakë të uan sapa nna nguë subebu,
nna nguë falaböjö ku nna nguë ngaña nguë ku së fo dantu pachidu kuta nguë napai dji nguë.
11 Nna nguë ineñ se ja gavu pa sua ineñ böjö,
pakë ineñ ja dana nguë jasa,
ja shina nguë jö ineñ shi na ta pa shina nguëfa valadji pa ineñ na ja jua djiëlu amea fëiuf.
12 Bi sa uan nna pantafala liba ië Kreta se me ku faa ja tëjantu ku ineñ:
«Nna nguë ië Kreta,
sa nna nguë olatuvëdji ja da fanchila,
nna limaia fëfëiu,
nna fochi kumu ku nna pisközhu».
13 Se ëli ja da vedadji;
dajantu shi,
se bo ja faa ineñ kuzhu amea shi ödu,
valadji pa ineñ tan vlame ba jonfa Djisu amea shi gavu,
14 valadji pa ineñ na ja ska folapë soia ineñ shi nna judio ja ska da juafa,
ñi mandamentu pöjödölö ku ja ska safa nguë fo vedadjif.
15 Da nna nguë ineñ shi sa limpi deenchi Nashiolo,
na të zhugan kumu ku sa ja nozhodu ñi ku sa ja fëiu pa na fo kumuf.
Mandji se da nna nguë ineñ shi na ja këlëf,
na të zhugan ja ku ja sa limpif,
pakë ineñ sa ku tëndëmentu dëneñ ku kusan dëneñ tudu nozhodu.
16 Ineñ ja faa ineñ jönsë Nashiolo,
mandji se fidu ja dëneñ ja ska naga,
pakë ineñ ja sa nna nguë ja të pashian ku subebu,
se ineñ na ja fë zhugan ja gavuf.