4
Deenchi Nashiolo ku Kilitu Djisu,
ku ske bi shimafan uan Alë ku gloria pa ëli bi juzhga nna nguë ineñ shi sa vivu ku nna nguë ineñ shi sa mölidu,
se amu da bo odji ngandji sai,
2 pa bo pegua nova,
ta ja da tempu gavu ö ta a ja ska da tempu shi na ja gavuf,
shina nguë kuzhu,
lonja öiö da ineñ,
da ineñ añimu ku pashiensa ku pa bo na chama shina ineñ jaf.
3 Pakë ske bi bi tempu shi zhugan nguë na ske ja ngongo tëndë shina ja shi sa gavuf,
shina ineñ ske ja jua uan sapa nna meeth ku ske ja shina ineñ jö ineñ shi ineñ ske ja ngongo tëndë.
4 Se ineñ ske ja vla olea da uan gachi vedadji se ineñ ske ja këlë klase soia soia tudu.
5 Mandji se bo ja fë ja ku shizhu gavu,
ja padësë,
pa olatuvëdji pa bo ja ska pegua evanjelio,
ja ska fë sulvisu bo tudu.
6 Se amu,
fo pachi amu,
amu sa plesteñi pa amu da öguë amu shimafan saklifisu,
pakë djia shi pa amu bai da bebezha.
7 Amu pezha uan pezha gavu,
se amu jaba ku jö shi ku amu bi ska pëtëpë iai,
se amu gada jonfa shi sa ku amu.
8 Se öseshi,
se amu ska gada uan jölöiö djustishi fo Shiölö,
ku se sa Jues shi dëtu,
se ëli ske da amu djia sala;
na ske da amu mosofa,
shina a shime nna nguë ineñ shi ku ngongo ku ja ska gada ta ëli tan ske vlame bi.
Lazhan Pelavöl
9 Fë ja dandjian pa bo bi bë amu;
10 *pakë Demas ku ngongo ku ja mundu se mashi,
lega amu moso pë iai se ëli ba Tesalonika.
Se Kresente ba loso loso Galasia,
se Titö ba loso loso Dalmasia.
11 *Se Lukas moso se sa iai ku amu.
Bo ja jua Marko pa bo ku ëli se bi,
pakë ëli ske sa uan zhuda ngandji dantu sulvisu amu.
12 *Se amu da Tikiko ba Efeso.
13 *Ta bo ja ska bi,
bo ja ma bitidu tempu fiiu shi amu gua pë Troas jadji Karpo,
a shime ku lavulu,
mashi ku zhugan lavulu peli kili kilidu.
14 *Se Alejandro,
nguë shi ja fë tabaia ku onfelu,
ëli fë amu uan sapa ja fëfëiu;
se Shiölö ske bi da ëli pagu shi ku ëli mësë.
15 Bo ten ja ska pinchidu ëli,
pakë ëli na tan ngongo tëndë nova shi no ska peguaf.
16 Djia pimëlu djustishi ku amu ba deenchi jues,
zhugan nguë na zhuda amuf,
ineñ tudu lega amu moso pë.
Amu pindji pa Nashian na sa tave dëneñf.
17 Mandji se Shiölö se zhuda amu se ëli se da amu foshi,
valadji pa amu fo pegua nova savasan,
ku pa fë pa nna nguë na ja këlë Nashianf tudu ten tëndë.
Se sa amea shi Shiölö fë pa amu sa legadu fo böjö lian.
18 Se Shiölö ske chila amu fo dantu ja fëfëiu tudu,
se ëli ske sava amu pa ëli ma amu ba dantu gövöndölö dösë.
¡Ilö ku gloria pa sempele ku pa sempele!
Amen.
Jabamentu manten Pelavöl
19 *Da Prisila ku Akila,
ku nna nguë jadji Onesiforo tudu manten.
20 *Erasto mdja palea Korinto,
se amu lega Trofimo ku ska danchi pë palea Mileto.
21 Fë ja pa bo bi anta pa da tendaua.
Se Eubulo,
ku Pudente,
ku Lino,
ku Klaudia ku nna namain tudu da bo manten.
22 Pa Shiölö sa ku spitu bo.
Pa galasa ja sa ku namsëdji.