Nova jabamentu tempu
3
A shime ta pa bo ten sëbë jö ineñ sai:
fa ta ske da jabamentu djia ske bi tempu fëfëiu.
2 Se nna nguë ske sa nna pöjödölö ku ja ngongo ku öguë dëneñ moso,
nna nguë ja ngongo ku djiëlu ku ja këlëdöguë dëli ku nna subebu,
nna nguë faa fala zhogoveadu,
ku na ske ja tëndë pai dëneñf,
nna nguë ku na ja lambela gavu shi utu nguë fë ineñf,
nna nguë na ja këlëf.
3 Ineñ na ja ngongo ku zhugan nguëf,
ñi na ja ngongo të padji ku zhugan nguëf,
ineñ ja sa nna nguë ja mucha da nguë,
ineñ na ja paadji chama fë ja fëfëiuf.
Ineñ ja sa nna nguë kusan fëiu,
ku nna namigu jö ineñ shi ja sa ja gavu tudu.
4 Ineñ ske sa nna nguë vëndë nguë,
tividu;
ineñ ja ngongo ja leva ja tudu,
se ineñ ja sa jamada liguilia vida sono sono mashi ku dji Nashiolo.
5 Ineñ ske ja msa shimafan ja ineñ sa nna nguë adola Nashiolo,
mandji se fidu fë ja dëneñ ske ja naga pödë fidu ja guëzha.
¡Na ja mëtë ku nna nguë shif!
6 Pakë ineñ se sa nna nguë ineñ shi ja lantela dantu jadji jadji ku ja ngaña naamain levu ku ja sa jalgadu ku pekadu,
ku ineñ ja lë öguë dëneñ bai ku klase mazhnamentu fëfëiu tudu.
7 Ineñ olatuvëdji ja ska ngongo shina kuzhu,
mandji se zhugan djia ineñ na ja ska jönsë vedadjif.
8 Se sa amea shi «meeth» ineñ sai ja tanja ku vedadji.
Se sa amea shime ku Janes ku Jambres bi ska tanja ku Moises,
ineñ ja sa napai ku tëndëmentu fëfëiu,
se ineñ ja sa pindjidu dantu jonfa dëneñ.
9 Mandji se ineñ na ske ja be löndji mashif,
pakë nguë tudu ja sëbë fa ineñ sa danadu,
amea shi ten shiga ku nguë dösu ineñ shi ten tanja ku Moises.
Jabamentu odji ku a da Timoteo
10 Mandji se bo lë jö ineñ shi amu ja shina nguë,
amea tadu amu ku amea fidu ja amu,
ku jonfa amu,
ku pashiensa amu,
ku ngongo amu,
ku foshi shi pa amu ja gaga mavida,
11 *ku amea shi a pëtëpë amu,
ku padësë ineñ shi ku amu ma,
shimafan ineñ shi shiga nguë loso loso Antiokia,
ku Ikonio ku Listra.
Mandji se Shiölö sava amu fo jö ineñ se tudu.
12 Sa vedadji fa nna nguë ineñ shi ja ngongo bibe uan vida gavu dajantu Nashiolo zhuntadu ku Kilitu Djisu tudu a ske ja pëtëpë ineñ,
13 mandji se nna nguë malvadu ku nna nguë ineñ shi ja ngaña nguë ineñ ske ja be ja fëfëiu mashi,
ja ngaña nguë ku pa ten ja ngaña ineñ.
14 Mandji se bo,
ja ska be deenchi ku jö ineñ shi a shina bo tudu,
ku bo këlë fa sa vedadji.
Bo sëbë gavu kë nna nguë ineñ shi shina bo kuzhu.
15 Fo kichi bo se bo bi sëbë Santu Fa Nashiolo,
ku se ja fo fë bo pa bo të shizhu valadji pa bo të savasan amea shi ku bo ja jonfa Kilitu Djisu.
16 Fa Nashian tudu sa ja ku Nashian se föfö bi,
se ja sa gavu pa ja shina nguë,
pa ja lonja öiö da nguë,
pa ja pë nguë jamangandji shi dëtu,
pa ja shina nguë amea shi pa ja fë ja ku djustishi,
17 valadji pa shividölö Nashiolo ja sa jotadu ntëlelele pa ja paadji fë sulvisu fidu ja tudu gavu.