Sodadji shishizhu Kilitu Djisu
2
Se dajantu shi bo,
mina amu,
ma foshi fo galasa shi ku bo të fo Kilitu Djisu.
2 Jö ineñ shi bo tëndë amu faa deenchi uan sapa dji nguë ku ja da lazhan gavu,
se sa jö shime ku bo të ja msa utu pöjödölö jonfadu valadji pa ineñ ja paadji shina utu dji nguë.
3 Ma mavida pachi bo shimafan uan sodadji shishizhu Kilitu Djisu.
4 Zhugan sodadji na ja fo fë utu tabaia patadu dantu vidaf,
pakë ta pa ëli fë ja gavu da nguë shi sa ja sa jasa dëli.
5 Se ten sa amea shime,
ku nguë shi ja ska fë uan fuga mindji jölë,
a na ja paadji jönsë ëli shimafan uan nganadölö shi ëli na ja fë amea alë fuga mindji jölëf.
6 Se nguë shi ja sa tabaiadölö matu,
ëli se ja sa ku dëtu pa ëli djogo fuluta ta ëli ja totolo.
7 Bo ja tëndë gavu jö ineñ se amu ska faa bo iai,
pakë Shiölö ske fë pa bo tëndë ja tudu gavu.
8 Ja lambela Djisukilitu,
ku bi sa uan nguë dantu jadji alë David,
ku se tan lanta fo dantu nna nguë ineñ shi mölë bebezha amea evanjelio amu.
9 Se dajantu evanjelio,
se amu ska ma mavida,
ba toja dantu djili se a mala amu ku guian shimafan uan nguë fë ja fëfëiu;
mandji se Fa Nashian na sa maladu ku guianf.
10 Dajantu shi,
se amu ja gaga ja tudu gavu dajantu nna nguë ineñ shi ku ëli ma,
valadji pa a shime ineñ ten ja të savasan ku gloria pa sempele dantu Kilitu Djisu.
11 Vedadji jonfadu:
Shi no ja mölë ku ëli,
a shime no ten ske bibe ku ëli.
12 *Shi no ja tanja,
no ten ske sa gövöndölö ku ëli.
Se shi no ja naga ëli,
ëli ten ske naga no.
13 Shi no ja chama jonfa ëli,
ontolo ëli ske sa jonfadu,
pakë ëli na paadji naga öguë dëlif.
Shividölö gavu deenchi Nashiolo
14 Bo na ja chama lambela ineñ jö sef,
ja manda ineñ deenchi Nashiolo pa ineñ na ja të pufia dana danadu,
pakë jö se na shivi da zhugan jaf,
shina ja ska pëndë nna nguë ineñ shi ja ska tëndë.
15 Fë ja gavu ineñ shi bo paadji fë tudu valadji pa da aen bo deenchi Nashiolo shimafan uan masebu gavu ku fë ja tudu gavu,
shimafan uan tabaiadölö ku na sa ku zhugan ja pa ëli të govanf,
ku ja shina nguë nova gavu vedadji dëtu.
16 Bo ja ska pinchidu fala nozho nozhodu ku fala shipë shipë,
pakë ske safa bo mashi mashi fo vida adola Nashiolo.
17 Se ja fëfëiu ineñ shi ineñ ska shina nna nguë ja ska panta panta shimafan jañi fende.
Se dantu ineñ se sa ku Imeneo ku Fileto,
18 ku ineñ safa fo vedadji.
Ineñ ja bë faa nna nguë ineñ shi bi mölë bebezha tudu tan lanta bi vida bebezha,
se amea sai se ineñ ska buia jonfa utu dji nguë.
19 Mandji se fundamentu Nashiolo sa suguladu ku sëiu sai:
«Shiölö jönsë nna nguë ineñ shi sa nna nguë dëli»,
ku «Pa nna nguë ineñ shi ja lezha ku namu Nashian tudu ja safa fo ja fëfëiu».
20 Dantu uan jadji ngandji,
na ja të pukulu oro ku dji plata mosof,
shina a shime dji taaba ku dji balu;
se zhugan ineñ ja sa dji djia ngangandji se utu se sa da djia shipë shipë.
21 Se shi,
uan nguë ja sa limpi fo jö ineñ sai,
ëli ske sa uan pukulu dondolo,
santu,
ku ja fë Shiölö fata,
ku ja sa vadu da ja gagavu tudu.
22 Jölë fo ja fëfëiu ineñ shi nna mashivin ja fë,
se bo ja jua djustishi,
jonfa,
ku ngongo,
ku padji pa bo ja zhunta ku nna nguë ineñ shi ja lezha da Shiölö ku kusan limpi.
23 Na ja sa tave lazhan ja sono sono ku na ja të opefa ñi jasaf;
ku bo sëbë gagavu fa tudu ja bi ku pezha.
24 Se uan shividölö Shiölö na fo sa uan nguë pezhafa,
shina uan nguë gavu ku nguë tudu.
Ku ta pa ëli sa ja shina nguë kuzhu,
pa ëli ja të pashiensa.
25 Se,
ku pa ëli ja shina kuzhu ku amea shi levu ku nna nguë ineñ shi ja pë topu,
ja gada pa Nashiolo ja fë pa ineñ tan vla ku ope tashi valadji pa ineñ ja jönsë vedadji,
26 pa valadji pa ineñ ja joda ku pa ineñ paadji jölë fo lasu shi djiabu mala ineñ pë djili valadji pa ëli ja fë ku ineñ jö shi ja da ëli vintadji.