EPISTOLA SHI FË DÖSU KU SAN PELAVÖL SKËVË DA
TIMOTEO
Manten
1
Pelavöl,
apostol Kilitu Djisu ku se a da bi dajantu vintadji Nashiolo,
ku se sa amea shi ëli plomëtë pa ja të vida amea Kilitu Djisu,
2 *da mina kilidu amu Timoteo.
Pa Nashian shi sa Pai ku Kilitu Djisu Shiölö no da bo galasa ku mindjikodji ku padji.
Ja da dezhupaga
3 Ta amu ja lambela bo dantu lezha amu djia ku nöchi,
se amu ja da Nashian shi amu ja shivi iai dezhupaga,
ku kusan limpi,
amea shi nna paipai amu ten shivi.
4 Jasa amu ja da bo olatuvëdji ku adöiö,
se amu sa ku vintadji pa amu bë bo valadji pa amu ja sa shia liguilia.
5 *Pakë amu ja lambela amea jonfa shishizhu shi sa ku bo,
ku se sa i shi pimëlu ten bi sa ku main main bo Loida,
ku main bo Eunise,
se amu sa suguladu faa bo ten të.
Na ja të govan da evanjeliof
6 Dajantu shi se amu faa bo,
pa bo tan banda bazha fögö ja gavu dödji shi Nashian da bo fo djia shi amu pë öma amu liba bo iai.
7 Pakë Nashian na da no uan spitu mendu jaf,
shina uan spitu pödë,
ku ngongo ku domina tuludöguë dishamentu.
8 Na ja të govan,
ola da lazhan Shiölö nof,
ñi pa bo na ten ja të govan amufa,
ku amu dajantu dëli sa amu sa djilif.
Shina,
bo ku pödë shi Nashian da bo,
se bo ja gaga mavida ineñ shi ske bi liba bo dajantu evanjelio.
9 Nashian sava no se ëli sama no pa no zhunta fë uan pövu santu,
na sa dajantu jö shi ku no fëf,
shina pakë se sa jö shi ëli mazhna dajantu amea galasa dëli ku sa ku no fo tompu chindadji,
amea Kilitu Djisu.
10 Mandji se öseshi se a msa gavu amea shi Savadölö no Kilitu Djisu fë da no,
ku ëli se chila mölë folo,
se ëli chila vida shi a na ja mölë fa bi jamian limpi amea evanjelio.
11 *Nashian ma amu se ëli da amu odji valadji pa amu sa peguadölö nova sai,
apostol ku meeth.
12 Dajantu shi se amu ska padësë da jö ineñ se tudu.
Mandji se amu na ske të govanf,
pakë amu sëbë nguë shi amu ska këlë,
se amu sa suguladu fa ëli të pödë pa ëli gada jö shi ëli manda amu ba toja djia sala.
13 Ja lë zhampulu amea shina ja shi bo shina fo amu,
ku pa bo ja ta ja jonfa ku ngongo shi sa ku no zhuntadu ku Kilitu Djisu.
14 Ku zhuda Spitu Santu ku ja ta ku no,
se bo ja fë lazhan ja gagavu ineñ shi a shina nguë ku Nashian jonfa bo.
15 Amea shi bo sëbë bebezha iai,
fa nna nguë loso loso Asia tudu lega amu moso pë;
ku se sa Fijelo ku Ermojenes.
16 Amu pindji pa Shiölö të mindjikodji da nna nguë jadji Onesiforo,
pakë uan sapa vëdji se ëli bi da amu añimu,
se ëli na bi sa ku govan dajantu amu bi sa djilif.
17 Shina,
i shi moso ku ëli bi da Roma se ëli jomesa ja jua amu shin djiskansa,
ba toja ku ëli dajonta ku amu.
18 Pa Shiölö lega pa ëli dajonta ku mindjikodji dëli djia sala.
Bo sëbë gavu amea shi ëli zhuda no ku sulvisu monchi dantu palea Efeso.