Jaata Timoteo shi fë dösu ja msa shimafan jabamentu jaata shi fo apostol Pelavöl, ku djia mölë dëli bi sa peetu bebezha (4:6). Dantu jaata sai libadë libadë se ëli ja da odji ineñ shi ku ëli bi da dantu jaata shi pimëlu bebezha se ëli tan ja da zhugan novu mashi.

Dantu jomesadu jaata sai ëli ja da uan manten kutu (1:1-2), se ten ja të uan fidu ja ku galasa da Nashiolo dajantu jonfa Timoteo ku ngongo shi ëli msa ku Pelavöl (1:3-5).

Pachi shi ngandji dantu jaata sai se ja sa pimëlu ja tudu, uan fala añimu pa na ja të govan evanjeliof, da evanjelio shi ku se Pelavöl da vida dëli ief. A shime Timoteo ta pa ëli ten sa plesteñi pa ëli ja ma mavida ku valëntë shimafan uan sodadji gavu Kilitu Djisu (2:3).

Zha se ja bi zhugan shizhu amea fidu ja ku Timoteo ske ta pa fë deenchi nna nguë ineñ shi ja ska shina nguë ja laladu, se a ten da ëli zhugan shizhu novu novu tëjantu ku nna padjil. Se jabamentu se ten të zhugan shina kuzhu ku monova tëjantu ku ëli (2:14–4:18). Jaata sai ja jaba ku jabamentu manten (4:19-22). Amea shi jaata sai sa skividu iai (4:6), se bi sa jabamentu jaata shi Pelavöl skëvë.