6
Nna nguë ineñ shi ja sa basu jalga sëlëva,
ta pa nna shiölö dëneñ ja mësë ondolo tudu,
valadji pa na ja zhogovea namu Nashianfa ñi jö ineñ shi no shina ineñf.
2 Se shi zhugan namsëdji ja sa ku shiölö ku ten ja këlë,
na sa pa chama da ëli ondolof dajantu ku ëli sa namain nof,
shina pa se sa öshi no tan ja shivi ëli gavu mashi,
pakë nna nguë ineñ shi ja bë gavu sulvisu ja sa nna nguë ineñ shi ja këlë ku ja sa nna namain kilidu no.
Ja shina nguë jö sai ku ja da nguë añimu.
Ngongo ku djiëlu sa fidu duadu pian dumadu
3 Shi uan nguë ja ska shina nguë utu shizhu pata patadu ku na sa jö shime ku Shiölö Djisukilitu shina nguëfa ñi ku jö ineñ shi ja sa adola Nashiolo shishizhuf,
4 ëli ja fë uan napai shipë ku na ja tëndë zhugan jaf.
Ja pufia da ëli ja sa shimafan uan danchi,
ku fo ala se ja jomesa pashian,
ku guela,
ku suta,
ku mazhna fëiu,
5 ku djisputa ku nna nguë ineñ shi ja sa ku tëndëmentu fëfëiu ku na ja jönsë vedadjif,
ku ja ma vida adola Nashiolo shimafan uan limedji pa ineñ ja ma ngana djiëlu.
6 Sa vedadji fa ku vida adola Nashiolo shishizhu a ja paadji ma ngana djiëlu,
mandji se ëli ja sa ku liguilia da jö shi ja sa ku ëli.
7 Pakë mundu se no na bi ku zhugan jafa,
se no na ten ske ma zhugan ja be ku nof,
8 shi no ja të jö shi pa kumu ku bitidu,
no ja paadji sa ku liguilia da jö sai.
9 Pakë nna nguë ineñ shi ja ngongo pa ineñ sa liku tudu ja pono da tentasan ku lasu.
Se ineñ ja fë uan sapa ja sono sono ku ja fëfëiu,
ku ja fë ineñ pono da mavida se ineñ ten ja pëndë se ineñ ten ja fea fea.
10 Pakë ngongo ku djiëlu se sa leezha klase ja fëfëiu tudu,
ku dajantu leva kuzhu,
se ineñ ja safa fo jonfa,
se ineñ ja sa ku duadu ödu.
Pelavöl manda Timoteo ba deenchi Nashiolo
11 Mandji se bo,
napai Nashiolo,
jölë da jö ineñ se tudu,
da uan vida ja djustishi,
adola Nashiolo,
ja jonfa,
ku ngongo,
ku ja ten ja gaga mavida ku pa ja sa pöjödölö shipë.
12 Pezha uan pezha gavu da jonfa,
na lega pa bo pëndë vida chindadjif,
pakë dajantu jö sai se Nashian sama bo,
se dajantu shi se bo ja msa jonfa bo,
deenchi uan sapa nna nguë ineñ shi ja da lazhan gavu.
13 *Öseshi,
se amu manda bo deenchi Nashiolo ku ja da ja tudu vida,
ku deenchi Kilitu Djisu,
ku da lazhan gavu fumözhö döguë dëli deenchi Ponsio Pilatu,
14 pa bo ja gada mandamentu shin noda,
pa ja sa uan nguë ku na ja të zhugan kupa jaf,
ba toja ta Shiölö no Djisukilitu tan ske bi.
15 Ku ta ske da tempu dëli se ëli ske msa nguë shi sa ku besa ku se sa ponodu Alë,
Alë nna alë,
ku Shiölö nna shiölö.
16 Ëli moso se na ja mölëf,
se ëli ja ta jamian uan fögö ku zhugan nna nguë na paadji iabef.
Zhugan pöjödölö na sa bë ëli ie zhafa ñi paadji bë ëlif.
¡Se ëli se sa ku ondolo ku pödë chindadji!
Amen.
17 Se pa nna nguë liku tempu sai,
manda ineñ pa ineñ na ja sa subebufa,
ñi pa ineñ na ja sa ku alagada dëneñ da gavu ineñ shi sa ku ineñf,
pakë gavu ineñ se na sa ja suguladuf,
shina fo Nashian shi sa vivu.
Ku se sa nguë shi ja da no ja tudu monchi mashi valadji pa no ja djogo da ineñ.
18 Manda ineñ pa ineñ ja fë nguë ja gavu,
pa ineñ ja sa nguë liku ku ja fë ja gagavu ku pa ineñ ja sa nna nguë öma betu,
ku pa ineñ ten ja sa plesteñi ola ja pachi jö ineñ shi ja sa ku ineñ.
19 Pa amea sai pa ineñ ja të ja gagavu ku se sa fundamentu shi ske da ineñ jö ineñ shi tan ske bi,
ku pa ineñ ten të vida chindadji.
Jabamentu lazhan
20 Timoteo,
ja fë lazhan jö ineñ shi a jonfa bo iai.
Na ja tëndë fala ja nozhodu nozhodufa ku fala shipë shipëf,
ñi jö ineñ se tudu sa fanchila ku ineñ ja sama «tëndëmentu»,
21 ku se zhugan nna nguë ku ja këlë amea sai,
ja sa safa fo jonfa.
Pa galasa sa liba namsëdji.
Amen.