Nna nguë ineñ shi sa jasa nna jasa jasa guëzha
3
Vedadji jonfadu:
Shi uan nguë sa ku dishamentu pa ëli sa obispu,
sa uan tabaia dondolo ku ëli ja dishia.
2 *Mandji se ske fë fata pa obispu ja sa uan nguë ku na ja të zhugan kupa jaf,
medu uan miela soso,
ku uan vida dëtu,
ku jodadu,
ku ondolo,
ku pa ëli ja ma nguë jadji dëli,
ku pa ëli ten paadji shina nguë kuzhu,
3 ëli na fo sa uan bedadölöfa,
ñi nguë fë guelaf,
shina uan nguë da padji;
ñi pa na ja dishia ja dji nguëf,
ñi pa ja ngongo ku djiëlu sunzhuf.
4 Ta pa sa uan nguë sëbë pë odji dantu jadji dëli,
ku pa nna mina dëli ja tëndë dëli ku pa ten ja da ëli ondolo.
5 Pakë shi uan nguë na sëbë pë odji dantu döma jadji dëlif,
¿kë amea shi ëli ske paadji fë lazhan guëzha Nashiolo?
6 Dajantu shi,
ëli na ta pa ja sa uan namain novuf,
pakë ëli ja paadji këlëdöguë dëli se ëli ja fo pono da kondena shime ku djiabu pono da.
7 A shime ten ja fë fata pa ja da lazhan gavu tëjantu ku ëli dantu nna nguë ku na ja këlëf,
valadji pa ëli na pono shin ondolo da dantu lasu djiabuf.
Nna nguë ineñ shi sa shividölö guëzha
8 Amea shime nna almoñi,
ta pa ja sa nna nguë dondolo,
ku na ja da fanchilaf,
ñi pa ineñ na ja sa nguë bëbë vian zhuntu zhuntuf pa ëli na ja ngana djiëlu sunzhuf.
9 Ëli ske ta pa ëli ja gada kusan limpi,
vedadji ngangandji ineñ se ku no ja këlë iai.
10 Pa ja puva ineñ pimëlu dantu uan tempu,
zha pa shi na ja të zhugan kupa tëjantu ku ineñf,
pa ineñ ja shivi shimafan nna almoñi.
11 Amea se me,
se nna miela dëneñ ske ta pa ineñ ja sa nna nguë dondolo,
pa ineñ na ja sa nna nguë ja mucha da nguëf,
shina nna nguë gavu ku jonfadu ja tudu.
12 Uan almoñi guëzha ta pa sa medu uan mooso soso,
ku pa ëli ten sëbë sa gövöndölö liba nna mina dëli ku dantu tuludöguë jadji dëli.
13 Pakë nna almoñi ineñ shi ku ja ska shivi gavu tabaia dëneñ,
ineñ ja mësë uan jamian dondolo,
se ineñ ske paadji sa ku ondolo monchi da galasa ku amea jonfa shi ineñ ja të ku Kilitu Djisu.
Vedadji jonfa shi sa ku no
14 Amu ska skëvë da bo,
mandji se amu ska gada pa amu ten ba bë bo goleme,
15 valadji pa shi amu ja ma tave bi,
pa bo ja sëbë amea fidu ja bo dantu jadji Nashiolo,
ku se sa guëzha Nashian shi sa vivu,
ku se sa finkian ku fundamentu vedadji.
16 Na sa ja pa të butanjaf fa ja ngandji se ja sa kumi adola Nashiolo:
Ëli ja msa amea shi ëli sa pöjödölö,
se Spitu Santu ja da lazhan fa ëli sa dëtu,
se nna anzhu bi bë ëli.
Se a pegua da ëli dantu nna nguë ineñ shi na sa judiof,
se nna nguë mundu këlë dëli,
se a ma ëli ba ösë dantu gloria.