Lezha da mundu nguintëlu nguintëlu
2
Jö shi pimëlu ku amu ja faa namsëdji sa pa ja ska lezha,
ku pa ten ja luga ja fë ja gagavu ja da Nashian dezhupaga da nna nguë mundu nguintëlu nguintëlu.
2 Ske ta pa ja lezha da nna nguë ineñ shi sa jasa jasa,
ku nna gövöndölö,
valadji pa no tudu ja bibe uan vida masu ku padji,
ku uan vida dondolo ku ja adola Nashiolo.
3 Jö se sa ja gavu ku ja fë gavu da Nashiolo ku se sa Savadölö no,
4 pakë ëli ngongo pa nguë tudu sava ku pa ten jönsë vedadji.
5 Pakë
Të uan ponodu Nashian moso,
ku uan ponodu nguë moso ku sa metadji Nashian ku nna pöjödölö:
Kilitu Djisu ku sa pöjödölö.
6 Pakë ëli se da öguë dëli pa ëli mölë valadji pa ëli sava nna nguë tudu.
Se a bi da lazhan gavu tëjantu ku ëli ta bi da tempu.
7 *Valadji pa ëli da lazhan jö sai,
se ëli sama amu pa amu sa peguadölö ku apostol,
se Nashian fë amu pa amu sa meeth nna nguë ineñ shi na sa judiof ja shina ineñ kuzhu tëjantu ku jonfa ku vedadji.
Vedadji se amu ska da namsëdji,
na sa fanchilaf.
Kutumu nna napai ku nna naamain
8 Amu ngongo,
pa jamian tudu pa nna napai ja lezha,
pa ineñ ja lanta öma santu dëneñ ba ösë ku kusan legadu,
shin pashian ku shin tavadji.
9 *A shime amu ten ngongo pa naamain ja bishi bitidu shi gavu ku fumözhö ku ja da Nashian ondolo,
ku pa ineñ na ten ja fë jabelu lanlanfa,
ñi ku orofa,
ñi ku budu ngola domalif,
ñi pa na ja sa ku bitidu ku ja kuta monchif.
10 Shina pa ja fëntë fëntë dëneñ ja sa ja gagavu ineñ shi ineñ ja ska fë,
ja ska msa nna naamain ineñ shi ja ska plomëtë pa adola Nashiolo.
11 Amu ngongo pa naamain ja shina kuzhu ku filili,
ku pa ineñ ten ja sa masu,
12 se amu na ten ngongo pa naamain ja shina nguë kuzhu deenchi pövufa,
ñi pa ëli na ja sa liba napaif,
shina pa ineñ da filili.
13 Pakë Nashian mindji Adan pimëlu,
zha se ëli mindji Iëva,
14 se Adan na se a ngañaf,
shina naamain,
se ta a ngaña ëli se ëli pono da pekadu.
15 Mandji se naamain ske ja sava ja pali nna mina,
ja mdja ku jonfa,
ku ngongo,
ku pa ja sa santu,
ku ja sa levu.