PIMËLU EPISTOLA KU SAN PELAVÖL SKËVË DA
TIMOTEO
Pelavöl da Timoteo manten
1
Pelavöl,
apostol Kilitu Djisu,
ku se da amu bi basu mandatu Nashian shi sa Savadölö no ku Djisukilitu ku se alagada no,
2 *manten Timoteo,
ku sa shimafan uan mina amu shishizhu dantu jonfa.
Pa Nashian shi sa Pai no ku Kilitu Djisu Shiölö no ta galasa ku mindjikodji ku padji dëneñ pë liba bo.
Pinchidu nna nguë shina nguë ja ku ja da fanchila
3 Amea shi amu luga bo ta amu bi ska së fo loso loso Masedonia,
pa bo mdja Efeso,
valadji pa bo pë ja tudu dëtu ku zhugan nna pöjödölö ku ska shina shizhu fanchila fanchila,
4 ñi pa ineñ na ja folapë soiafa ñi lazhan ineñ shi ja tëjantu ku nna paipai no ku na ja jabaf.
Jö ineñ se tudu ja fë pa të djisputa se na ja zhuda pa be deenchi ku mötölö Nashiolof,
ku sa ja a fë ku jonfa.
5 Pakë shizhu shi a ma da odji sai sa pa no ngongo ku no no me fo uan ngongo ku ja bi fo uan kusan limpi,
ku uan kusan legadu gavu ku uan jonfa shishizhu.
6 Zhugan nguë së fo klase ngongo sai,
se ineñ ja pëndë ku pufia sono sono shin sinchidu.
7 Ineñ ja ngongo sa nna meeth dalë Nashiolo,
shinke ineñ tëndë jö ineñ shi ineñ ja ska fala ñi sëbë jö ineñ shi ja ska faa ku suguladu.
8 No sëbë fa alë sa ja gavu,
shi a ja ma amea shi gavu.
9 Ta pa no sëbë fa zhugan alë a na ja da da nna nguë dëtuf.
Shina da nna nguë fë ja fëfëiu ku nna nguë subebu,
da nna pekadölö ku da nna nguë ineñ shi na ja da Nashian ondolofa ñi ku sa ja nozhoduf,
da nna nguë ineñ shi ja chila pai dëneñ ku main dëneñ vida folo,
ku nna nguë chila nguë vida folo,
10 da nna nguë kabajölöiö,
ku pöjödölö ineñ shi ja djuni ku nna nguë ineñ shi sa shimafan ineñ me,
ku nna nguë vëndë sëlëva,
ku nna nguë ja da fanchila,
ku nna nguë ja jula fanchila;
ku sa fa,
nna nguë ineñ shi ja fë ja tëjantu ku shina ja vedadji.
11 Se jö sai se sa jö shi evanjelio gloria Nashian besa ja jonfa amu ku ja shina nguë.
Nashian të mindjikodji Pelavöl
12 Amu ja da Shiölö no Kilitu Djisu dezhupaga,
nguë shi ja da amu foshi,
pakë ëli jonfa amu se ëli pë amu liba sulvisu dëli,
13 *benga zha pa tudjia amu bi ska faa fala zhogoveadu,
se amu bi ska pëtëpë nguë,
ja suta nguë.
Mandji se Nashian të mindjikodji amu,
pakë ontolo amu bi sa danadu,
se amu na bi ska këlëf.
14 Se Shiölö no da amu galasa dëli monchi mashi,
se ëli da amu ngongo ku jonfa shi no ja fo të amea Kilitu Djisu.
15 Vedadji jonfadu ku se mësë pa nguë tudu këlë:
fa Kilitu Djisu bi mundu valadji pa ëli bi sava nna pekadölö tudu,
ku dantu ineñ tudu amu se sa pimëlu.
16 Mandji se Nashian të mindjikodji amu,
valadji pa Djisukilitu msa amu pashiensa dëli tudu.
Pa amea se pa amu se sa zhampulu dantu nna nguë ineñ shi bi ske këlë dëli valadji pa të vida chindadji.
17 Dajantu shi ¡Ondolo ku gloria olatuvëdji da Alë shi sa pa sempele,
ku na ja mölëfa,
ku a na ja bë ëlif,
se ëli se sa ponodu Nashiolo shi sa pa sempele ku pa sempele!
Amen.
Pelavöl da Timoteo mandamentu
18 Mandamentu sai,
mina amu Timoteo,
amu pë liba bo,
valadji pa amea nova pantafala ineñ shi a bi faa tëjantu ku bo bebezha iai,
pa bo sa shimafan uan sodadji ku ja pezha gavu,
19 pa bo gada jonfa bo ku kusan gavu,
ku dajantu utu ineñ na ja sa tave kusan dëneñf,
se zhugan ineñ ba fundu dantu jonfa shimafan uan navian mete domali.
20 Dantu ineñ sa ku Imeneo ku Alejandro,
ku se sa nna nguë ineñ shi amu da ba da Satanas valadji pa ineñ ja shina chama faa fala zhogoveadu tëjantu ku Nashiolo.