PIMËLU EPISTOLA KU SAN PELAVÖL SKËVË DA
TIMOTEO
Jomesadu
Dantu vadji pata patadu ineñ shi ëli ja pegua nova gavu, se apostol Pelavöl bi ska jonta ku uan sapa nna jamada vadji. Uan ineñ bi sa uan mashivin Timoteo, main dëli bi sa judio se pai dëli se bi griego (Fidk 16:1-3; Rom 16:21; 2Kor 1:1; Flp 1:1). Amea jaata sai (1:3), Pelavöl bi pindji Timoteo pa ëli mdja palea Efeso valadji pa ëli pë ja tudu gavu fo shina kuzhu fanchila ineñ shi bi ska be ja pasa dantu guëzha (1:6-7; 4:1-5).
Nova jaata sai ja msa nova gavu da mundu nguintëlu nguintëlu. Pelavöl ja faa Timoteo pa ja lezha da Nashiolo da mundu nguintëlu nguintëlu, ba toja da nna gövöndölö ku nna jasa jasa tela, ku jö sai, valadji pa no ja paadji ta ku padji ku masu, ja tëndë Nashiolo ku pa no ten ja sa gavu ku utu nguë (2:1-2). A shime a ten ja bë amea shi a ja jözhë dantu guëzha pë, pakë a ja faa ja tëjantu ku amea tadu ku fidu ja nna nguë ineñ shi ja ma guëzha be deenchi ku ten ja sa shi dantu dëli (3:1-13).
Dantu uan sapa jö ineñ shi Pelavöl ja skëvë da Timoteo, i sai se a ja paadji faa nna mashivin:
«Na lega pa ja chila ondolo fo bo pakë bo sa mashivinf, shina ta pa bo sa uan zhampulu da nna namain amea shi bo ja faa fala, amea fidu fë ja bo, ku ngongo, ku jonfa ku uan vida limpi» (4:12).
Se a shime:
«Pezha uan pezha gavu da jonfa, na lega pa bo pëndë vida chindadjif, pakë dajantu jö sai se Nashian sama bo, se dajantu shi se bo ja msa jonfa bo, deenchi uan sapa nna nguë ineñ shi ja da lazhan gavu» (6:12).