Pelavöl ska pindji pa ja lezha
3
Se jabamentu,
nna namain,
ja lezha da no,
valadji pa nova Shiölö ja be dandjian ba da jamian tudu pa ja ma ku ondolo,
amea se fë dantu namsëdji iai.
2 Namsëdji ten ja lezha valadji pa no sa legadu fo nna nguë malvadu ku ja fë ja masan masan,
pakë ineñ na ja të jonfaf.
3 Mandji se Shiölö se sa jonfadu,
se ëli ske fë pa namsëdji të foshi se ëli ten ske gada namsëdji fo nguë shi fëiu.
4 Se no jonfa namsëdji fo Shiölö shi ja fë pa namsëdji ja be ja fë jö ineñ shi no da namsëdji odji iai.
5 Ku pa Shiölö ten ja ma namsëdji bai ku pa namsëdji ja të uan ngongo dantu kusan namsëdji shimafan dji Nashiolo ku pa namsëdji ten ja të foshi ja ma mavida shimafan Kilitu.
Dëtu pa ja tabaia
6 Mandji se no da namsëdji odji,
nna namain,
ku namu Shiölö no Djisukilitu,
pa namsëdji safa fo nna namain ineñ shi ska fë vida föli ku na ska lë jö ineñ shi ineñ shina fo nof.
7 Pakë namsëdji me se sëbë amea shi pa namsëdji ja lë zhampulu no.
No na bibe uan vida föli dantu namsëdjif,
8 ñi no na kumu ampan zhugan nguë shin da paguf.
Shina no tabaia ku foshi djia ku nöchi,
valadji pa no na sa jalga liba zhugan namsëdjif.
9 Anta vedadji ku no bi sa dëtu pa no pindji namsëdji pa zhuda no,
mandji se no tabaia valadji pa no da namsëdji zhampulu shi pa namsëdji paadji lë no.
10 Ta no bi sa ku namsëdji iai,
no da namsëdji odji sai:
«Shi uan nguë na ja ngongo tabaiaf,
pa ëli na ten ja kumuf».
11 Mandji se no ba sëbë fa zhugan nguë dantu namsëdji ska bibe uan vida föli,
na ja ska fë zhugan tabaiaf,
shina ineñ ska lantela dantu jö ineñ shi na ja tëjantu ku ineñf.
12 Jata pöjödölö ineñ sai se no ja da ineñ odji,
se no ja da ineñ añimu ku pödë Shiölö Djisukilitu ku pa ineñ ja tabaia gavu mashi valadji pa ineñ ja ngana vida.
13 Mandji namsëdji,
nna namain,
na ja jansa ku fë nguë gavuf.
14 Shi uan nguë dantu namsëdji na ja sa tave jö ineñ shi no ska faa dantu jaata sef,
nguë sai namsëdji ja pë öiö liba dëli,
se namsëdji na tan ja zhunta ku ëlif,
valadji pa ja da ëli govan.
15 Mandji se namsëdji na ja pia ëli shimafan uan namiguf,
shina ja faa ku ëli shimafan uan namain.
Jabamentu manten Pelavöl
16 Pa tuludöguë Shiölö padji da namsëdji padji olatuvëdji shi ku amea tudu.
Pa Shiölö ja sa ku namsëdji tudu.
17 Amu,
Pelavöl,
amu skëvë da namsëdji fo öma amu,
ku se sa shinali jaata amu tudu,
se sa amea shi amu ja skëvë.
18 Pa galasa Shiölö Djisukilitu sa ku namsëdji tudu.
Amen.