Jö ineñ shi ske shiga anta pa Shiölö tan vlame bi
2
*Mandji se nna namain,
öseshi tëjantu ku ta Shiölö no Djisukilitu tan ske vlame bi ku ta no ske zhunta ku ëli,
se no ska luga namsëdji,
2 pa namsëdji na ja tuka amea shi namsëdji ja mazhna ja shipë shipë shifa ñi pa namsëdji na ja lega pa zhugan nguë na fë namsëdji baga jasa ja faa ëli të uan nova fo pantafalafa,
ö ku ëli të uan fala ö jaata shimafan ja fo nof,
ku ja sinchidu ja faa djia shi Shiölö tan ska bi da bebezhaf.
3 Namsëdji na ja lega pa zhugan nguë fë namsëdji danaduf.
Pakë anta pa djia se da,
se nna namigu ske pezha pimëlu ku Nashiolo,
se ske msa tuludöguë dëli masebu shi ja fë ja fëfëiu,
nguë shi sa ku jatigu pa ëli sa pindjidu ai.
4 Nguë sai se sa namigu shi ja lanta tëjantu ku jö ineñ shi ja të namu «Nashiolo» ö ten ja sa ja pa ja adola,
ba toja ku ëli ja tusan dantu jadji Nashiolo,
ja fë ja shimafan ja ëli se sa Nashiolo.
5 ¿Namsëdji na tan ska lambelafa jö ineñ se tudu amu da namsëdji lazhan bebezha ta ontolo amu bi sa dantu namsëdji ua?
6 Se öseshi se namsëdji sëbë jö shi ska mala ëli pë san,
valadji pa ëli na msa tuludöguë dëli öshi ontolo na sa da tempu shif.
7 Pakë sa vedadji fa kumi ja fëfëiu jomesa bebezha ja msa pödë dëli;
mandji se fata pa chila nguë shi öseshi ska ëli topu ai folo.
8 Tadashi se ske msa tuludöguë dëli nguë shi ja fë ja malvadu ku se sa nguë shi Shiölö Djisu ske të fea fea ku spitu böjö dëli se ëli ske të ja tudu të fea fea ta ëli tan ske vlame bi ku gloria dëli.
9 *Tëjantu ku nguë shi ku ja fë ja malvadu ineñ se ske bi,
ku fidu ja Satanas;
se ëli ske bi ku uan pödë ngandji,
ku shinali ku fidu ja ngangandji fanchila fanchila dëli.
10 Se ëli ske usa klase ja fëfëiu tudu valadji pa ëli ngaña nna nguë ineñ shi tudu bi sa kondenadu,
pakë ineñ na bi ngongo ma ñi këlë vedadji valadji pa ineñ të savasanf.
11 Dajantu shi se,
Nashian lega pa uan pödë ja ngaña ineñ ku pa ineñ këlë fanchila,
12 valadji pa kondena nna nguë ineñ shi na ngongo këlë vedadjif,
shina ku ineñ se ja ngongo ku ja fëfëiu.
Kutumu gavu nna kitan
13 Mandji se no,
ta pa no ja da Nashian dezhupaga olatuvëdji dajantu namsëdji,
nna namain kilidu Shiölö amu,
pakë pimëlu pimëlu se Nashian ma namsëdji valadji pa namsëdji të savasan,
amea tabaia Spitu Santu ku ja fë pa namsëdji ja sa santu ku jonfa shi sa ku namsëdji dantu vedadji.
14 Dajantu jö sai se Nashian sama namsëdji amea evanjelio se ku no ska pegua da namsëdji iai:
valadji pa namsëdji ten paadji të pachi gloria Shiölö no Djisukilitu.
15 Dajantu shi,
nna namain,
namsëdji ja ska be dëtu ku pa namsëdji na ten ja ska kësë jö ineñ shi tuludöguë no shina namsëdjif,
ja sa amea faa fala ku amea jaata.
16 Pa tuludöguë Shiölö no Djisukilitu,
ku Nashian shi sa Pai no,
ku ngongo ku no ku dajantu galasa dëli se ëli da no añimu chindadji ku uan alagada gavu,
17 pa da kusan namsëdji añimu ku pa gada pa namsëdji olatuvëdji ja faa fala ku ten ja fë ja gagavu.