2 Pa Nashian shi sa Pai no ku Shiölö Djisukilitu ta galasa ku padji dëneñ pë liba namsëdji.

3 Nna namain amu,

olatuvëdji se ta pa no ja da Nashian dezhupaga dajantu namsëdji,

amea shi sa dëtu,

dajantu pa jonfa namsëdji ja ska këësë mashi,

ku ngongo shi sa dantu namsëdji tudu olatuvëdji ja ska monchi mashi fo uan nguë ba utu nguë.

4 Dajantu shi,

se no ja ska da lazhan namsëdji ku liguilia dantu guëzha guëzha Nashian tudu,

tëjantu ku pashiensa ku jonfa dantu metadji mavida sai ku amea pëtëpë se ku namsëdji tudu ja ska gaga iai.

5 Jö ineñ se tudu ja ska msa djustishi gavu fa Nashian sa dëtu,

valadji pa namsëdji të ondolo shi pa namsëdji paadji lantela dantu gövöndölö Nashiolo,

ku se sa jö shi fë ku namsëdji ska ma mavida sai.

6 Pakë Nashiolo,

sa dëtu,

se ëli ske da pagu ku mavida da nna nguë ineñ shi fë pa namsëdji ja ma mavida.

7 Se namsëdji ineñ sai,

ku ma mavida öseshi iai,

se ëli ske da namsëdji tempu pa namsëdji djiskansa a shime ku no.

Jö ineñ se tudu ske pasa djia shi djia Shiölö Djisu ske msa tuludöguë dëli fo ösë ku ludjadu ku bazha fögö ku nna anzhu pödë pödë dëli,

8 valadji pa ëli bi fë djustishi ku nna nguë ineñ shi na bi jönsë Nashianfa,

ñi ineñ na ja këlë evanjelio Shiölö no Djisukilituf.

9 Se a ske jatiga ineñ pa ineñ sa pindjidu pa sempele,

se a ske zhuga ineñ ba löndji fo deenchi Shiölö ku gloria dëli ku pödë dëli.

10 Se ta ske da djia shi Shiölö tan ske bi valadji pa pövu santu dëli da ëli gloria ku pa nna namain dëli tudu leva ëli;

dajantu amea se namsëdji këlë lazhan gavu ineñ shi no da namsëdji iai.

11 Dajantu shi se no ja lezha olatuvëdji da namsëdji,

valadji pa Nashian no fë pa namsëdji sa nna nguë dondolo da sama shi ëli sama namsëdji,

ku fo pödë dëli pa ëli fë pa kumpli ja tudu da gavu shi namsëdji ja dishia ku da tabaia shi namsëdji ja fë dajantu jonfa.

12 Valadji pa amea sai,

pa da namu Shiölö no Djisu gloria dajantu namsëdji,

se ëli se ske fë pa namsëdji të ondolo dajantu galasa Nashian no ku dji Shiölö no Djisukilitu.