Tëjantu ku palea Tesalonika ku nna nguë guëzha shi ku Pelavöl bi bla pë ala iai, ja ta öiö dantu lazhan 1 Epistola nna nguë tesalonika. Jaata shi fë dösu da nna nguë tesalonika, ja msa jö shime amea shi ngandji mashi batanchi ku 1 Epistola da nna nguë tesalonika, mandji se ëli se ja msa amea betu mashi ku lazhan tëjantu ku ta Shiölö tan ske vlame bi.

Jaata sai ja jomesa ku uan lazhan ku ja sa manten (1:1-2); ja lë ëli uan fidu ja galasa ku Nashiolo ku uan lezha da nna kitan Tesalonika (1:3-12).

Dantu pachi shi ngandji mashi ja msa lazhan tëjantu ku ta Shiölö tan ske vlame bi (2:1-12). Jaata sai ja ngongo deta zhugan ja buia buiadu ku bi sa dantu nna nguë guëzha, pakë zhugan ineñ bi ska faa, Pelavöl bi shina ineñ fa, Shiölö bi bi shiga bebezha.

Zha se ja be deenchi mashi se a ja shina kë jö ineñ shi ja sa gavu amea fidu ja ku ta pa ja sa dji nna kitan (2:13-17), se a ten ja pindji lezha da Pelavöl ku nna balë dëli (3:1-5), se jabamentu se a ja pë nna nguë guëzha vatu tëjantu ku zhugan nguë ku bi ska bibe uan vida buia buiadu ku föli, ku bi sa dajantu, shizhu fanchila ineñ shi ineñ bi tëjantu ku ta Shiölö tan ske vlame bi. Zhugan ineñ na bi ska ngongo tabaiaf, ineñ bi ska bibe ku jö ineñ shi utu nna namain ja ska da ineñ. Tadashi se Pelavöl ja lambela ineñ fa ëli olatuvëdji ëli ja tabaia, valadji pa ëli na ja sa basu zhugan nguëf. Dajantu shi se ëli ja faa ineñ ku dëtu: Nguë shi na ja ngongo tabaiaf ëli na ten ske sa dëtu pa ëli ja kumuf (3:6-15).

Pelavöl ja sugula ineñ fa, latela ku öma iadu pë tudu sa ja dëli (3:17; bë Gal 6:11).