5
Se tëjantu ku djia ku tempu,
nna namain amu,
na fë fata pa amu tan skëvë da namsëdjif.
2 *Pakë namsëdji sëbë gavu fa djia Shiölö,
ske bi shimafan uan futadölö ku ja bi nöchi.
3 Ta nguë tudu ske ja faa:
«Jamian tudu sa ku padji ku suguladu»,
se öshi öshi ja tudu ske ja lolo,
se zhugan nguë shi na ske paadji jölëf,
shimafan amea shi uan naamain ja të dölö pali ta ëli ja sa pañia.
4 Mandji se namsëdji,
nna namain amu,
namsëdji na ja sa dantu jamian kuluf,
valadji pa ta ja da djia shi Shiölö tan ska bi pa na ja ma namsëdji ku supichi shimafan uan futadölöf.
5 Pakë namsëdji tudu sa nna mina jamian fögö djidjidu ku nna mina dji djia.
No na sa dji nöchifa ñi dji jamian kuluf.
6 Dajantu shi,
se na ta pa no ja ska djuni shimafan utu dji nguëf,
shina pa no ja sa vatu ku spetu.
7 Nna nguë ineñ shi ja ska djuni,
nöchi se ineñ ja djuni;
se nna nguë ineñ shi ja ska beda,
nöchi se ineñ ten ja beda.
8 *Mandji se no,
sa nna nguë djia,
se ta pa olatuvëdji pa no ja sa öiö betu ku spetu.
Ske ta pa no ja fë lazhan öguë no,
ku böjö kusan no,
ku jonfa ku ngongo,
ja fë lazhan jasa no ku bëtë donfelu alagada,
ku se sa savasan.
9 Pakë Nashian na da no bi pa no bi ma jatiguf,
shina pa no bi ma savasan amea Shiölö no Djisukilitu.
10 Djisukilitu mölë dajantu no,
valadji pa ja sa fa no sa vivu ö no sa mölidu,
pa no zhunta bibe ku ëli.
11 Dajantu shi,
se ta pa namsëdji ja da namsëdji me añimu ku foshi,
amea se namsëdji ska fë iai.
Jabamentu shina ja Pelavöl
12 No luga namsëdji,
nna namain amu,
pa namsëdji ja da nna nguë ineñ shi ja tabaia dantu namsëdji ondolo,
nna nguë ineñ shi ja msa namsëdji jamangandji Shiölö ku ten ja panta namsëdji.
13 Ta pa namsëdji ja da ineñ ondolo ku pa namsëdji ja ngongo ku ineñ monchi,
dajantu tabaia shi ineñ ska fë.
Pa namsëdji ja bibe ku padji dantu namsëdji me.
14 A shime no ten pindji namsëdji,
nna namain amu;
pa namsëdji ja panta nna pisközhu,
ku pa namsëdji ja da nna nguë ineñ shi na ja të añimuf añimu,
pa namsëdji ja zhuda nna nguë ineñ shi ja sa levu,
pa namsëdji ja të pashiensa ku nna nguë tudu.
15 Namsëdji ja ska pinchidu pa zhugan nguë na ja ma pagu fëiu da pagu fëiuf,
anta pa sa shi,
ja sa gavu pa namsëdji ja fë gavu ku namsëdji namsëdji me,
ku nna nguë tudu.
16 Pa namsëdji olatuvëdji ja sa ku liguilia.
17 Pa namsëdji olatuvëdji ja ska lezha.
18 Pa namsëdji olatuvëdji shi ja ska da Nashian dezhupaga,
pakë i sai se sa vintadji Nashian da namsëdji shimafan nna namain dëli ku Kilitu Djisu.
19 Pa namsëdji na ja paka fögö Spitu Santuf.
20 Pa namsëdji na ja zhono nova nna pantafalaf.
21 Pa namsëdji ten ja puva jö ineñ se tudu,
pa namsëdji ja mdja ku pachi shi gavu.
22 Pa namsëdji ja safa fo klase ja fëfëiu tudu.
Jabamentu manten Pelavöl
23 Ku pa tuludöguë Nashiolo me,
Nashian shi sa dji padji,
ja fë pa namsëdji tudu ja sa santu ntëlelele,
ku pa ëli gada spitu,
alma ku öguë tudu,
shin zhugan noda da ta Shiölö no Djisukilitu tan ske bi.
24 Se nguë shi jonfadu ku se sama namsëdji,
ske kumpli jö ineñ se tudu.
25 Nna namain,
namsëdji ten ja ska lezha da no.
26 Namsëdji ja da nna namain tudu manten ku uan beso santu.
27 Amu da namsëdji odji,
ku pödë shi fo Shiölö,
pa namsëdji lëë jaata sai da nna namain tudu.
28 Pa galasa Shiölö Djisukilitu sa ku namsëdji.
Amen.