Vida shi ja fë gavu da Nashiolo
4
Dajantu shi,
nna namain,
no pindji namsëdji se no ten ja da namsëdji añimu ku namu Shiölö Djisu pa namsëdji ja ska be deenchi ja bibe amea shi pa ja fë gavu da Nashiolo,
amea shi namsëdji shina ja fo no.
Dajantu shi se namsëdji ja ska be ja fë jö ineñ sai bebezha mashi ku mashi.
2 Namsëdji tudu sëbë odji shi no da namsëdji fo pachi Shiölö Djisu.
3 Pakë dishamentu Nashian sa pa namsëdji sa ku uan vida santu,
pa namsëdji ja safa fo fë ja nda ölöluia,
4 pa nguë tudu ja sëbë gada öguë dëneñ amea santu ku ondolo,
5 pa na ja lega pa mazhnamentu fëfëiu ja ma nguë bef,
amea shi nna nguë ineñ shi na ja këlë Nashianf ja fë.
6 Pa zhugan nguë na fë namain dëli machifa ñi ngaña ëli da jö ineñ sef.
Pakë Shiölö ja da nguë jatigu ödu da jö ineñ se tudu,
amea shi ku no faa namsëdji ku da namsëdji lazhan bebezha.
7 Pakë Nashian na sama no pa bi fë vida sunzhuf,
shina uan vida santu.
8 Dajantu shi se ja sa nguë shi na ja sa tave shina ja ineñ se tuduf,
ëli na ska naga zhugan pöjödölöfa shina Nashiolo,
ku se sa nguë shi da namsëdji Spitu Santu.
9 Mandji se tëjantu ku ngongo dantu namsëdji me,
na fë fata pa amu tan skëvë da namsëdjif,
pakë tuludöguë Nashian se shina namsëdji pa namsëdji ja ngongo ku namsëdji me.
10 Se sa shi,
namsëdji ten ja ngongo ku nna namain namsëdji ineñ shi tudu ja ta loso loso Masedonia.
Mandji se no luga namsëdji,
nna namain,
pa ngongo namsëdji ja këësë monchi mashi.
11 Ja jua amea shi pa namsëdji ja ta ku padji ku pa namsëdji ja sa faladu ku nongosu namsëdji,
ja fë tabaia ku öma namsëdji amea shi no da namsëdji odji iai,
12 valadji pa dajantu amea shi ëli ja bibe se namsëdji ja të ondolo ku nna nguë ineñ shi na ja këlë Nashianf,
ku pa namsëdji na ja ska gada zhugan ja fo zhugan nguëf.
Ta Shiölö tan ske vlame bi
13 Nna namain amu,
no na ngongo pa namsëdji na sëbë jö shi ja shiga ku nna nguë ineñ shi mölë bebezhaf,
valadji pa namsëdji na sa modoia shimafan nna nguë ineñ se ku na të alagadaf.
14 Pakë amea shi no këlë fa Djisu mölë se ëli tan ske lanta bi vida,
se sa amea se me ku no ten këlë fa Nashiolo ske lanta Djisu ku nna nguë ineñ shi këlë dëli iai fo dantu nna nguë mölë bebezha.
15 *Dajantu shi se no ja faa namsëdji vedadji sai ku sa fala fo Shiölö,
fa no ineñ shi,
ontolo sa vivu ba toja ta Shiölö ja bi,
no na ske be deenchi nna nguë ineñ shi mölë bebezhaf.
16 Pakë a ske tëndë uan fala odji,
ku fala nna anzhu,
ku fala pitu Nashiolo,
se tuludöguë Shiölö ske dësë fo ösë.
Se nna nguë ineñ shi bi mölë ku këlë Kilitu iai se ske lanta pimëlu.
17 Zha,
se no ineñ shi ontolo ske sa vivu se a ske ma no bai,
zhuntadu ku ineñ,
dantu növu,
valadji pa no ba dajonta ku Shiölö liba fiezha;
se sa amea shi no ske ta ku Shiölö pa sempele.
18 Dajantu shi,
namsëdji ja da namsëdji me añimu ku fala ineñ sai.