3
*Tadashi,
ku no na tan paadji gaga mashif,
se no mazhna pa no mdja Atenas.
2 Pa no da namain no Timoteo bi,
ku sa jamada tabaia Nashiolo ku ten ja zhuda pa pegua nova evanjelio Kilitu.
Se no da ëli bi valadji pa ëli da namsëdji añimu ku pa ëli zhuda namsëdji tëjantu ku amea jonfa namsëdji,
3 valadji pa zhugan nguë na lega pa fë ëli danadu dajantu tavadji ineñ sef;
pakë namsëdji me,
sëbë fa ske ta pa no ma mavida ineñ sai.
4 A shime,
djia shi ontolo no bi sa ku namsëdji iai,
no bi ska faa namsëdji amea shi no ske të tavadji ineñ sai,
se amea shi ten shiga ku namsëdji bi sëbë.
5 Dajantu shi,
se a shime amu,
ku amu na tan bi paadji gaga mashif,
se amu manda pa ba pongota tëjantu ku jonfa shi sa ku namsëdji,
pa na sa fa namsëdji të tentasan dajantu tentadölö,
valadji pa tabaia no na ba së shipëf.
6 *Mandji se ta Timoteo tan vlame bi fo palea Tesalonika;
ku ëli bi ku nova gavu da amea shi namsëdji ja jonfa ku ngongo shi sa ku namsëdji,
ku amea shi olatuvëdji namsëdji ja ska lambela no ku ngongo,
ku dishamentu shi sa ku namsëdji pa bë no se ten sa i shime ten sa ku no pa no ten bë namsëdji.
7 Dajantu shi,
nna namain,
dantu mavida ineñ sai ku tavadji ineñ se sa ku no iai,
se no të añimu da jonfa namsëdji.
8 Öseshi se no tan të vida öshi ku no sëbë fa namsëdji ska jonfa Shiölö.
9 Se fë,
¿kë amea shi no paadji da Nashian no dezhupaga monchi mashi dajantu namsëdji,
ku dajantu liguilia shi no të tëjantu ku namsëdji deenchi Nashian no?
10 Se djia ku nöchi se no ja ska lezha libadë libadë da Nashian valadji pa no bë fesan namsëdji,
ku pa no tan fë pa jonfa namsëdji tan sa dëtu mashi.
Lezha Pelavöl da nna jamada dëli
11 No dishia pa tuludöguë Nashian shi sa Pai no,
ku Shiölö no Djisu,
zhuda no pa no paadji ba ua namsëdji.
12 Ku pa Shiölö fë pa namsëdji ja këësë ku pa namsëdji ja ngongo ku namsëdji me,
ku nguë tudu,
amea shi no ja ngongo ku namsëdji tudu.
13 Pa dantu kusan namsëdji ja sa ödu mashi valadji pa ta Shiölö no Djisu ja bi ku nna santu santu dëli,
pa vida santu namsëdji ja sa shin noda deenchi Nashiolo ku sa Pai no.
Amen.