Tabaia shi Pelavöl fë palea Tesalonika
2
Tuludöguë namsëdji me,
nna namain,
sëbë fa,
bi se no bi toja namsëdji iai na bi sa shipëf.
2 *Mandji se,
benga zha pa sa amea shi namsëdji tudu sëbë,
fa dantu palea Filipos,
se a suta no se da no ku kuzhu,
mandji se Nashian vëlë no pa no da namsëdji lazhan evanjelio Nashiolo,
ku jonfa dantu uan pezha ngandji.
3 Pakë añimu no na bi së fo ja ngaña nguëfa ñi no na bi ska faa fala ku mazhnamentu sunzhufa ñi pa no na pë lasuf.
4 Shina sa fa Nashian ngongo pa ëli ten da no ku pa ëli ten jonfa no evanjelio,
pa no faa amea sai,
na sa pa no fë ja pa fë gavu da nna pöjödölö mosof,
shina pa no fë ja gagavu da Nashiolo,
ku ja golo kusan no tudu.
5 Amea shi namsëdji sëbë,
zhugan djia no na faa ineñ ku fala gödö gödöfa,
ñi pa no ma zhugan lazhan pa no ngana djiëluf.
Nashian sëbë gavu.
6 Zhugan djia no na jua pa zhugan nguë da no ondolof,
ñi fo namsëdjifa ñi fo utu dji nguëf.
7 Benga zha pa no ku sa apostol Kilitu,
no bi paadji pindji pa namsëdji zhuda no dajantu ondolo ngandji shi sa ku no,
mandji se no na fë shifa,
shina no fë lazhan namsëdji shimafan uan main ku ja kia nna mina dëli ku ngongo,
8 se ten sa amea shime ku no ten ja ngongo ku namsëdji,
se no bi dishia da namsëdji,
na sa evanjelio Nashian mosofa,
shina a shime ku tuludöguë vida no dajantu ngongo shi no të ku namsëdji.
9 Pakë nna namain amu iai,
namsëdji lambela amea shi no bi ska fë tabaia ödu ku padësë valadji pa no ngana vida.
No bi ska tabaia djia ku nöchi,
dajantu pa no na sa jalga liba zhugan namsëdjif,
pa no paadji pegua evanjelio Nashiolo.
10 Namsëdji tudu ja da lazhan,
se a shime Nashian ten ja da lazhan,
da amea fidu ja no ku namsëdji amea santu,
dëtu shin zhugan noda ku namsëdji nna nguë ja këlë.
11 A shime namsëdji tudu ten sëbë amea shi ku uan pai ja tëndë ku nna mina dëli,
se ten sa amea shime ku no ten fë lazhan namsëdji,
ja da namsëdji añimu ku foshi unian unian namsëdji.
12 Se no ten da namsëdji añimu ku fia namsëdji kusan ku da lazhan gavu valadji pa namsëdji ja bibe amea shi pa ja da Nashiolo ondolo,
ku ëli ja sama namsëdji ba dantu gövöndölö dëli ku gloria dëli.
13 Dajantu shi,
se olatuvëdji se no ja da Nashian dezhupaga,
pakë djia shi namsëdji tëndë nova Nashian shi no pegua da namsëdji iai,
se namsëdji na ma shimafan nova pöjödölöfa shina nova Nashiolo.
Ku anta vedadji se sa nova Nashiolo,
ku se ten sa i shi ja fë pa tuka namsëdji ineñ shi ja këlë iai.
14 *Pakë namsëdji,
nna namain,
namsëdji bi fë jö shime ku nna nguë guëzha Nashian ku se sa dji Kilitu Djisu shi ja ta Judea,
pakë ineñ ten padësë shime fo nna nguë tela dëneñ me amea shime ku nna guëzha dëneñ se ten ma öma nna judio.
15 *Nna nguë ineñ sai se chila Shiölö Djisu vida folo ku a shime nna pantafala,
se ineñ jölë no.
Ineñ na ja fë ja gavu da Nashianfa se ineñ sa ku tavadji tëjantu ku nguë tudu,
16 pakë ta no ten ja ngongo faa ku nna nguë ineñ shi na sa judiof valadji pa ineñ ten të savasan;
se ineñ na ja lega no pa no faa ku ineñf.
Se amea sai se ineñ olatuvëdji shi ja ska shia ku mindjida pekadu dëneñ.
Mandji se pa jö ineñ se tudu jaba,
se uan jatigu ödu Nashian ske bi liba dëneñ.
Pelavöl dishia pa ëli bë nna nguë tesalonika
17 Mandji se no,
nna namain,
benga zha pa no safa fo namsëdji da uan tempu kutu,
ku no na bi ska bë namsëdji ku vitaf,
mandji se no bi sa ku namsëdji dantu kusan no,
dajantu shi se no bi sa ku dishamentu monchi pa no ba bë namsëdji.
18 Se no bi ngongo ba ua namsëdji,
uan sapa ope,
amu Pelavöl,
anta vedadji uan sapa ope se amu fë vadu pa amu bai,
mandji se Satanas ja pöpa.
19 Pakë,
¿a kë i shi sa alagada shi sa ku no,
ku liguilia no ku jö shi no ja fo ma këlëdöguë no deenchi Shiölö no Djisu,
ta ëli tan ske vlame bi?
¿Kë nna nguë tan ske paadji sa shi na ja sa namsëdjif?
20 Shiën,
namsëdji se sa gloria ku liguilia no.