PIMËLU EPISTOLA KU SAN PELAVÖL SKËVË DA NNA NGUË
TESALONIKA
Manten
1
*Pelavöl,
Silvano ku Timoteo da nna nguë guëzha palea Tesalonika ku sa ku Nashian shi sa Pai ku Shiölö Djisukilitu manten.
Da namsëdji galasa ku padji.
Zhampulu nna nguë palea Tesalonika
2 Olatuvëdji no ja da Nashian dezhupaga dajantu namsëdji tudu,
ja lambela namsëdji dantu lezha no.
3 Se olatuvëdji se no ja ska lambela deenchi Nashian shi ku sa Pai no,
amea shi namsëdji ja tabaia ku jonfa,
ku sulvisu ngongo namsëdji ku amea shi namsëdji ja gaga padësë ja të alagada ku Shiölö no Djisukilitu.
4 Nna namain kilidu no deenchi Nashiolo,
no sëbë fa ëli se ma namsëdji.
5 Pakë djia shi no pegua nova gavu da namsëdji iai,
na bi sa palavulu mosof,
shina no ten fë ja msa pödë Nashiolo ku dji Spitu Santu,
ku galasa monchi mashi.
Namsëdji tudu sëbë gavu amea shi no bi sa dantu namsëdji,
ja jua gavu da tuludöguë namsëdji me.
6 *Se namsëdji bi ska lë zhampulu no ku dji Shiölö,
ja ma nova ku liguilia shi Spitu Santu bi ska da namsëdji dantu uan sapa padësë.
7 Dajantu shi se namsëdji bi sa zhampulu da nna nguë ja këlë tudu loso loso Masedonia ku dji Akaia.
8 Pakë fo jomesadu namsëdji se nova Shiölö sa fa ja panta panta,
na sa dantu Masedonia ku Akaia mosofa,
shina sa fa ja bë jamian tudu,
se nguë tudu sëbë amea jonfa shi namsëdji të ku Nashiolo,
ku dajantu shi na tan fë fata pa no tan fa namsëdji zhugan jaf.
9 Pakë ineñ ineñ me,
se ja da lazhan amea shi no bi toja namsëdji ku namsëdji ma no,
ku amea shi namsëdji lega nna nashian balu ku namsëdji ja vla ba shivi Nashian shi sa vivu ku sa i shi vedadji,
10 ku pa gada pa Djisu fo ösë bi,
Mina Nashiolo,
nguë shi Nashian tan lanta bi vida fo dantu nna nguë ineñ shi mölë bebezha.
Djisu se sa nguë shi ja sava no fo jatigu ödu shi tan ske bi iai.