Dantu vadji dëli shi fë dösu, se apostol Pelavöl bi ba palea Tesalonika se ëli jomesa uan guëzha (Fidk 17:1-8). Palea sai se bi jasa palea loso nna griego ku a ja sama loso loso Masedonia. Se dantu uan tempu ta ëli tan ngongo ba ua nna kitan palea sai, pakë ëli bi sëbë fa fidu ja dëneñ sa ku leva (1:2-4). Se dajantu ku ëli na bi ske paadji ba ua ineñf, se ëli skëvë jaata sai, ku se sa jaata skividu shi antigu mashi dantu Testamentu Novu.

Dantu Epistola sai, se a ja msa amea shi nna pövu palea sai bi sa monchi, se bi sa zhuntadu ku nna utu nguë dala, nna nguë pata patadu ku fo utu tela tela, ku uan sapa nna nguë tela tela, se dantu ineñ se a ten bi ja jonta nna judio, ku se bi sa mashi pakë ineñ bi sa ku uan jadji Nashian nna judio. Epistola sai se ja da nguë lazhan fa Pelavöl ku nna balë dëli se sa nna pimëlu pimëlu nguë ma evanjelio Djisukilitu ba Europa.

Tabaia Pelavöl dantu palea Tesalonika da fuluta ku fë ku nna judio ineñ sai tudu tan vla fë kitan uan namolo ngandji nna griego dondolo ku nna naamain liku, mandji se ten lanta «nna judio ineñ shi na bi ska këlëf» uan pashian ödu, se fë ineñ lanta uan taba pedji ngandji ku fë ku Pelavöl ma ja dandjian ku së fo ala (Fidk 17:4-10).

Nna kitan Tesalonika bi ska këlë fa Kilitu mölë se ëli tan ske lanta bi vida, se öseshi se ineñ bi ska gada, shimafan nna kitan tudu, pa Kilitu tan vlame bi, se Pelavöl ja da ineñ añimu pa ineñ të alagada da ta Kilitu tan ske vlame bi, mandji se ëli ja lambela ineñ fa zhugan nguë na sëbë djia shi ske saf, pakë ëli ske bi djia shi zhugan na ske ja gada ëlif, shimafan ta uan futadölö ja bi nöchi (5:2). Dajantu shi se ëli ja da ineñ añimu pa ineñ sa vatu, ja bibe amea shi dëtu, pa ineñ na ten ja sa tavadji shimafan amea shi utu nguë ja bibef (5:6). Pelavöl ja da ineñ manten ja sama ineñ pa ineñ ja sa ku liguilia olatuvëdji, ku pa ineñ ja ska lezha ola tuvëdji (5:16-17).