4
*Namsëdji,
nna shiölö,
pa namsëdji ja sa nna nguë dëtu ku kusan legadu ku nna sëlëva namsëdji.
Pa namsëdji ja ska lambela fa a shime namsëdji ten sa ku uan Shiölö ku ja sa ösë.
Amea shi pa fë ja tudu gavu
2 Ja ska ma tempu olatuvëdji pa ja lezha,
ja sa plesteñi ku pa ja ska da Nashian dezhupaga.
3 A shime ten ja ska lezha da no,
valadji pa Nashian ja bla poto tudu da no valadji pa no ja pegua nova ku pa no ten ja da lazhan kumi jö ineñ shi sa ja Kilitu,
ku se sa dajantu jö shi fë ku amu sa djili.
4 Namsëdji ja ska lezha valadji pa amu da ineñ lazhan amea shi pa amu ja pegua gavu.
5 *Namsëdji ja ska bibe ku tëndëmentu gavu ku nna nguë ineñ shi na ja këlëf,
ja ska ma fölöshö tempu gavu.
6 Pa lazhan namsëdji ku ineñ ja sa olatuvëdji ku galasa ku vintadji,
pa namsëdji ten ja sëbë amea shi pa ja kundji ineñ unian unian.
Jabamentu shina kuzhu ku manten Pelavöl
7 **Namain kilidu no Tikiko,
shividölö jonfadu ku jamada tabaia ku Shiölö,
ske da namsëdji lazhan kë amea shi ja ska be ku amu.
8 Ku se amu ska da ëli bi da namsëdji,
valadji pa ëli da namsëdji monova no,
pa ku amea sai pa namsëdji ma añimu.
9 *Ku ëli ska bë namain kilidu ku jonfadu no Onesimo,
ku sa uan nguë dantu namsëdji.
Ineñ se ske da namsëdji lazhan jö ineñ shi ska shiga no iai.
10 *Se Aristarko,
ku sa jamada djili amu,
da manten bi da namsëdji;
a shime Marko,
ku sa mina namain Bernabe.
Namsëdji sëbë jö ineñ shi ske ta pa namsëdji fë bebezha;
shi ëli ja bi bë namsëdji,
namsëdji ja ma ëli gavu.
11 A shime Djisu,
nguë shi a ten ja sama Dëtu,
da manten bi da namsëdji.
Ineñ se sa ponodu nna namain ineñ shi bi sa judio ku ja zhuda amu ku tabaia shi amu ja fë tëjantu ku gövöndölö Nashiolo,
se ineñ se manja kusan amu.
12 *Epafras da manten bi da namsëdji,
uan shividölö Kilitu Djisu,
ëli sa uan nguë dantu namsëdji,
se ëli ja ska lezha da namsëdji olatuvëdji dantu lezha dëli,
valadji pa namsëdji ja ta suguladu ntëlelele,
ku ja da öguë namsëdji jö ineñ shi tudu ja sa vintadji Nashiolo.
13 Amu ja ska da lazhan gavu amea shi Epafras ja ska pë jasa namsëdji monchi ku nna nguë ineñ shi ja ta palea Laodisea ku palea Ierapolis.
14 *A shime Lukas,
babëlu kilidu no da manten bi da namsëdji,
ku Demas.
15 Namsëdji ja da nna namain ineñ shi ja ta palea Laodisea manten.
Namsëdji ten ja da Ninfa ku a shime nna nguë guëzha ineñ shi ja zhunta dantu jadji dëli.
16 Ta a ja lëë jaata se jaba dantu namsëdji,
se a ten ja da ba da guëzha palea Laodisea,
valadji pa ten lëë ala,
se namsëdji ten ja lëë jaata shi ten ja fo ala bi.
17 *Namsëdji ja faa Arkipo:
«Pa ëli kumpli ku sulvisu shi Shiölö da ëli pa ëli ba fë».
18 Amu,
Pelavöl,
amu ska skëvë i sai fo öma amu ku latela amu.
Ja lambela fa amu sa djili.
Pa galasa Nashian sa ku namsëdji.