3
Dajantu shi,
se fë ku namsëdji tan lanta bi vida ku Kilitu,
namsëdji ja jua jö ineñ shi sa ja dösë,
jamian shi Kilitu ska tusan benda dëtu Nashiolo.
2 Pa namsëdji ska mazhna jö ineñ shi sa ja dösë,
pa na sa jö ineñ shi ja ta san telaf.
3 Pakë namsëdji tudu mölë bebezha,
se Nashian jöndë vida namsëdji ku Kilitu.
4 Ta Kilitu,
ku se sa vida namsëdji,
ja msa tuludöguë dëli,
tadashi se namsëdji ten ske msa tuludöguë namsëdji ku ëli dantu gloria.
Vida shi veiu ku vida shi novu
5 Tadashi,
se namsëdji ja fë,
pa jö ineñ shi sa ku namsëdji tudu ku sa ja mundu sa iai tudu ja mölë:
pa chama fë ja nda ölöluia,
ku ja sunzhu,
dishamentu buiadu ku mazhnamentu fëfëiu,
ku dishia gagavu mundu sai,
ku sa amea adola nashian balu.
6 Dajantu jö ineñ se tudu se jatigu ödu Nashian ske bi liba nna nguë ineñ shi na ja tëndë ëlif;
7 ku namsëdji ten bi ska fë dantu vida namsëdji tudjia.
8 Mandji se öseshi ta pa namsëdji ten chama fë jö ineñ se tudu:
mazhna fëiu,
ma pashian,
të pashian,
mucha da nguë ku fala tuvadu.
9 *Namsëdji ja chama da fanchila uan nguë ku utu nguë,
öseshi ku namsëdji chila bitidu veiu döguë tudjia pë san ku visio dëneñ,
10 *ku se ja be ja bishi bitidu döguë shi novu ku se ja sa amea fesan nguë shi mindji ëli ku se ja fë novu ba toja tëndëmentu ntëlu.
11 Se na tan sa uan ja ngandji muntëf pa sa griego ö judiof,
sa kutadu napai ö na sa kutaduf,
sa nguë utu tela,
na sëbë kuzhufa,
sëlëva ö legadu,
shina pa Kilitu se sa ja tudu ku pa ëli se ja sa ja tudu.
12 *Dajantu shi,
shimafan pövu ku Nashian se ma,
nna nguë santu ku ja sa ku ngongo,
ku ja sa ku uan kusan mindjikodji,
nguë gavu,
levu,
ku ja ngongo ku nguë,
ku ja të pashiensa,
13 *pa amea sai pa namsëdji ja gaga uan ku utu nguë,
pa namsëdji ja pada nguë shi namsëdji ja të ja kusan ku utu nguë.
Pa amea shi Shiölö pada namsëdji iai,
pa namsëdji ten ja pada namsëdji me.
14 Pa liba ja tudu pa namsëdji ja sa bishidu ku ngongo,
ku se sa jodo shi ja msa amea shi a ja zhuntadu shishizhu.
15 Ku pa padji Kilitu se ja sa alë dantu kusan namsëdji,
pakë se sa jö shi fë ku Nashian sama namsëdji pa namsëdji sa uan ponodu öguë soso.
Ku pa namsëdji ja sa nna nguë ja da nguë dezhupaga.
16 *Pa fala Kilitu mdja dantu kusan namsëdji pa sempele ku gagavu dëli tudu.
Pa namsëdji ja ska shina ku ja ska faa namsëdji me ja ku tëndëmentu.
Ku kusan ku ja da Nashian dezhupaga ja janta salmos,
ku imno ku janta ineñ shi sa dji spitu.
17 Se ja sa jö ineñ shi namsëdji ja ska fë ö ska fala,
ja ska fë ku namu Shiölö Djisu,
ja da Nashian shi sa Pai dezhupaga amea dëli.
Jö ineñ shi a ja fë dantu jadji uan kitan
18 *Nna miela,
namsëdji ja sa basu medu namsëdji,
amea shi ja sa gavu ku Shiölö.
19 *Nna medu,
ja ngongo ku nna miela namsëdji pa namsëdji na ja sa ödu ku ineñf.
20 *Nna mina,
pa namsëdji ja da pai namsëdji ondolo ja tudu,
pakë jö sai se ja fë gavu da Shiölö.
21 *Nna pai,
na ja fë pa nna mina namsëdji ja ma pashian,
valadji pa ineñ na ja pëndë añimuf.
22 *Nna sëlëva,
namsëdji ja ska tëndë nna shiölö namsëdji mundu sai,
pa na ja sa öshi ineñ ja ska pia namsëdji mosof,
shimafan ja namsëdji ska ngongo ngana föböli fo nna pöjödölöf,
shina fo dantu kusan legadu ku pa ja da Nashian ondolo.
23 Ja sa jö ineñ shi namsëdji ja ska fë tudu,
ja ska fë ku kusan tudu,
shimafan ja a ska shivi Shiölö ku na sa ja a ska shivi nna pöjödölöf.
24 Pakë namsëdji sëbë fa,
namsëdji ske të gagavu shi,
Shiölö ske da namsëdji shimafan uan pachi gagavu.
Pakë namsëdji ska shivi Kilitu,
ku se sa Shiölö namsëdji shishizhu.
25 *Mandji se nguë shi ja fë ja fëfëiu,
ëli ske të pagu ja fëfëiu ineñ shi ku ëli fë,
pakë Nashian ja juzhga nguë tudu amea shime.