2
Pakë amu ngongo pa namsëdji sëbë fa amu ska pezha da namsëdji,
ku da nna nguë laodisea ku da nna nguë ineñ shi ontolo na sa jönsë fesan jala amuf.
2 Amu ja ska pezha valadji pa ineñ ja të añimu dantu kusan dëneñ,
valadji pa ineñ ja sa zhuntadu dantu ngongo ku ba toja pa ineñ ten të tëndëmentu gagavu tudu,
valadji pa ineñ ja jönsë kumi ja jöndjidu Nashiolo,
ku se sa tuludöguë Kilitu;
3 pakë fo ëli se gagavu sëbëdölö kuzhu ku tëndëmentu tudu sa jöndjidu.
4 Se sa jö ineñ shi amu ja ska faa namsëdji valadji pa zhugan nguë na ja ngaña namsëdji ku fala gagavuf.
5 Pakë benga zha pa amu na sa plesteñi dantu namsëdjif,
amu sa ku namsëdji dantu spitu,
se ja fë gavu da amu ta amu ja bë fa namsëdji ska be ku odji amea dëtu ku jonfadu namsëdji da Kilitu.
Shia gola gola vida ku Kilitu
6 Dajantu shi,
pa amea se namsëdji ma Kilitu Djisu Shiölö namsëdji iai,
pa se sa amea shi namsëdji ten ja bibe shimafan nna nguë sa ja Kilitu,
7 pa namsëdji ja ta leezha pë ëli,
ja sa suguladu ku ëli amea jonfa shi sa ku namsëdji,
amea shi ëli shina namsëdji ku ja da Nashian dezhupaga olatuvëdji.
8 Namsëdji ja ska pinchidu:
na ja lega pa zhugan nguë ja ngaña namsëdji amea shizhu sono sono ku shina kuzhu fanchila,
pakë ineñ na ja ianga pë Kilituf,
shina pë fidu kuzhu amea shi nna nguë tela ja fë ku spitu dëneñ shi ja domina mundu sai.
9 Pakë Kilitu se sa shia gola gola Nashian shi se a ja bë ku öguë pöjödölö.
10 Se dantu dëli,
ku ëli se sa jasa pödë tudu ku gövöndölö,
se namsëdji ma ja tudu dantu dëli.
11 Se a shime fo ëli,
se a «kuta napai» namsëdji,
na sa uan kuta ku a fë ku öma pöjödölöf,
shina kuta ku sa ja Nashian se fë ta zhunta Kilitu ku no ku ëli chila öguë pekadu fo no.
12 *Se ta a bachizha namsëdji,
se a ten ntela namsëdji ku Kilitu,
se a shime a tan lanta namsëdji bi vida ku ëli,
pakë namsëdji këlë pödë Nashian shi lanta ëli fo dantu nna nguë mölë bebezha.
13 *Se namsëdji,
ku bi sa mölidu dajantu pekadu,
se dajantu ku namsëdji na chila öguë pekadu pë sanf;
mandji se öseshi se ëli da namsëdji vida zhuntadu ku ëli,
ja pada no pekadu tudu.
14 * Se a bolo jaata shi bi sa skividu ku deuda shi ontolo bi tëjantu ku no iai ku se bi ske kondena no,
se ëli chila fo metadji se ëli da pë kusu.
15 Se Nashian chila pödë fo nna spitu ineñ shi bi të pödë,
se ëli fë se ineñ pasa govan deenchi nguë tudu amea mölë Kilitu liba kusu.
16 *Dajantu shi,
pa zhugan nguë na ja juzhga namsëdji da zhugan ja dajantu ku jö ineñ shi namsëdji ja kumu ö ja bëbëfa,
ö dajantu zhugan djia ku ja sa djia fesa,
önuian novu ö djia djiskansaf.
17 Jö ineñ se tudu sa sombolo jö ineñ shi tan ske bi bi,
mandji se vedadji ja tudu sa Kilitu.
18 Namsëdji na ja lega zhugan nna nguë ineñ se pa ja kondena namsëdjif,
pakë ineñ ja fë shimafan ja ineñ sa nna nguë shipë ku se ineñ se ja adola nna anzhu.
Se ineñ ja ska faa ineñ ja bë kuzhu,
se ja fë ineñ ja sinchi öguë dëneñ nna nguë ngangandji dajantu mazhnamentu dëneñ.
19 *Se ineñ na ja sa zhuntadu ku Kilitu ku se sa jasa öguëf,
ku se sa jö shi ja fë pa da öguë kumu ku pa ten zhunta ku fisu fisu tudu ku amea sai se ja ska këësë amea vintadji Nashiolo.
Ja bibe amea shi Nashian ngongo
20 Namsëdji mölë bebezha ku Kilitu se namsëdji na tan sa maladu pë spitu ineñ shi ja domina mundu sef.
¿Pakë ja fë,
ku namsëdji ja bibe shimafan ja ontolo namsëdji sa nna nguë mundu,
ja sa basu alë ineñ sai,
21 shimafan:
«¡Na fala jö sef!
¡Na kumu jö salaf!
¡Na fala jö se ku öma bof!»?
22 Se alë ineñ tudu poto potodu amea shi a ja ska usa ineñ,
se tudu ja sa mandamentu ku ja shina nna pöjödölö kuzhu.
23 Zhugan jö ineñ sai ja sa ku klase tadu ja ku ja kë ja të tëndëmentu,
ku zhugan fidu ja guëzha afoshi,
ku amea fë nguë shipë fanchila,
fidu ja ödu da öguë,
mandji se na ja shivi da zhugan ja deenchi dishamentu pekadu jañi döguëf.