EPISTOLA KU SAN PELAVÖL SKËVË DA NNA NGUË
KOLOSAS
Manten
1
Pelavöl,
apostol Djisukilitu fo vintadji Nashiolo,
ku namain no Timoteo,
2 da nna santu ku nna namain jonfa Kilitu ineñ shi ja ta palea Kolosas,
manten.
Pa Nashian shi sa Pai no da namsëdji galasa ku padji.
Fidu kuzhu ku dezhupaga
3 Olatuvëdji shi ta no ja lezha da namsëdji,
no ja da Nashiolo,
Pai Shiölö no Djisukilitu dezhupaga,
4 pakë no tëndë nova amea jonfa shi sa ku namsëdji tëjantu ku Kilitu Djisu,
ku ngongo shi namsëdji të ku nna nguë pövu santu tudu,
5 ku añimu dajantu jö ineñ shi sa gadadu da namsëdji ösë.
Ku se sa jö ineñ shi namsëdji tëndë amea nova vedadji shi sa dantu evanjelio,
6 ku bi toja namsëdji.
Nova sai ska këësë ja da fuluta pachi mundu tudu,
se sa amea shime ku a ten shina namsëdji fo djia shi namsëdji tëndë a fa amea galasa Nashiolo ku namsëdji jönsë vedadji.
7 *Se sa jö ineñ shi namain kilidu no Epafras shina namsëdji,
nguë shi tabaia ku namsëdji ku se namsëdji të shimafan uan shividölö jonfadu Kilitu.
8 Se ëli se da no lazhan ngongo shi sa ku namsëdji ku Spitu Santu.
9 Dajantu shi nna namain,
fo djia shi no ba sëbë,
se no na chama lezha da namsëdjifa ku pindji Nashian pa ëli fë pa namsëdji jönsë gavu vintadji dëli ku pa ëli ten da namsëdji klase shizhu ku tëndëmentu shi ku ja fo Spitu Santuf.
10 Pa amea se pa namsëdji ja nda shimafan nna nguë mësë da Shiölö,
ja ska fë ja gagavu ineñ shi ja fë gavu da ëli,
ja ska da klase fuluta fidu ja gagavu ku pa ja ska këësë ku tëndëmentu Nashiolo.
11 No pindji pa ëli,
ku pödë gloria dëli,
pa ëli fë namsëdji ödu,
valadji pa namsëdji paadji gaga ja tudu ku foshi monchi ku pashiensa,
ku liguilia,
12 ku liguilia ja da Pai dezhupaga,
ku se da namsëdji pödë valadji pa namsëdji paadji ma fögö djidjidu pachi gagavu shi ëli ska da pövu santu ai.
13 Nashian fë pa no sa legadu fo basu pödë jamian kulu kulu se ëli ma no ba gövöndölö Mina kilidu dëli,
14 *ku se sa nguë shi dajantu dëli se no sa legadu ku se a ja pada pekadu.
Kilitu se atu mashi
15 Ëli se sa fesan Nashian shi a na ja bëf.
Mina pimëlu anta pa mindji ja tudu.
16 Pakë,
se fo amea dëli,
se Nashian mindji jö ineñ shi sa tudu
ösë ku san tela tudu.
Jö ineñ shi a ja bë
ku jö ineñ shi a na ja bëf,
jö ineñ shi ja sa liba töli,
ku ja sa ku pödë,
nna gövöndölö ö nna nguë da odji.
Ja tudu a mindji amea dëli ku pa da ëli.
17 Ëli se bi anta pa ja tudu bi sa
se amea dëli se ja tudu ontolo ja sa odji.
18 *Se ëli se sa jasa öguë,
ku sa se guëzha.
Ëli se sa jomesadu,
se ëli se sa mina pimëlu
ku tan lanta bi vida fo dantu nguë mölidu,
pa fo ëli pa ja tudu ja ta dantu dëli,
20 *se amea dëli,
se ku öguë dëli se ëli tan jözhë ja tudu pë,
jö ineñ shi sa tela a shime ku jö ineñ shi sa ösë,
ja fë padji amea sangui dëli fo van kusu.
21 Se a shime namsëdji,
ku utu tempu namsëdji bi sa nna nguë patadu ku nna namigu dantu miolo namsëdji,
ja fë fidu ja fëfëiu,
se öseshi se ëli jözhë ja tudu pë ku namsëdji,
22 mandji se öseshi se Nashiolo tan ba jözhë ja tudu pë ku namsëdji amea öguë shi ku Kilitu ma mölë ku ëli padësë ta ëli bi sa mundu sai.
Se ëli fë jö ineñ sai valadji pa ëli ma namsëdji tudu ba deenchi dëli,
santu,
shin noda ku shin kupa zhugan kuzhu.
23 Mandji ske ta pa namsëdji mdja dëtu liba jonfa sai,
simentadu ku dëtu shinke namsëdji lega alagada shi evanjelio ja da.
Evanjelio sai se sa i shi namsëdji bi tëndë iai ku a pegua dantu jö ineñ shi a mindji basu dösë tudu,
ku se fo amu,
Pelavöl,
ku amu vla fë shividölö.
Tabaia Pelavöl da guëzha
24 Öseshi ja ja ska fë gavu da amu dajantu amu ska padësë da namsëdji,
pakë amea sai se amu ska ma pachi ku öguë amu,
jö ineñ shi ja ska fata fo padësë Kilitu da guëzha,
ku se sa öguë dëli.
25 Se amea sai se amu vla fë uan shividölö amea mötölö Nashiolo,
ku se ëli da amu pa amu da namsëdji,
valadji pa kumpli Fa Nashiolo.
26 Se sa kumi jö shi fo tompu tompu ku nna zhenchi zhenchi Nashian bi bi jöndë,
mandji se öseshi se ëli msa nna santu santu dëli.
27 Se Nashian bi ngongo pa ineñ jönsë gagavu gloria dëli fo kumi jö ineñ sai fo nna nguë na ja këlë Nashianf.
Se kumi jö sai sa:
Kilitu ja ta dantu namsëdji.
Ku se sa gloria shi sa ku namsëdji ku pa ja ska gada.