Dantu palea Kolosas se bi sa ku uan pimëlu guëzha kitan ineñ shi na jomesa fo nna nguë ineñ shi ku na sa judiof. Epistola sai sa ja ku Pelavöl skëvë da nna nguë palea Kolosas, valadji pa ineñ ja jönsë fidu ja savasan fo Nashiolo. Nguë shi jomesa guëzha sai a ja sama ëli Epafras, ku bi sa nguë palea sai (1:7). Fo jomesadu se ineñ bi ma nova gavu sai ku liguilia ngandji, mandji se tadji mashi se ineñ jomesa ja safa fo jö ineñ shi a bi shina ineñ iai.

Dajantu shi se Pelavöl ja jomesa ja da Shiölö dezhupaga dajantu jonfa shi sa ku nna santu santu ku nna namain jonfadu Kilitu ineñ shi ku ja ta palea Kolosas, se ëli ja sugula ineñ amea fidu ja savasan Nashiolo. Se dantu Epistola sai se ëli ten ja msa ineñ fa Kilitu se sa liba jö ineñ shi a ja mindji tudu, se Kilitu se sa jasa öguë ku se sa guëzha. Ëli se bi sa anta pa mindji ja tudu se ja tudu ja sa ja fo ëli.

Dantu Epistola sai, Pelavöl ja msa amea shi saklifisu Djisu fo van kusu, se ëli sava nna pekadölö se ëli tan zhunta ineñ ku padji ku Nashiolo. Ëli ja faa ineñ ku nna kitan tudu fa, ineñ mölë bebezha fo ja mundu sai, se öseshi, amea Kilitu, se Nashiolo tan da ineñ vida shi shishizhu (3:3-4). Dajantu shi pa na ja sa tave pa uan nguë sa judiofa ö dji utu tela ö loso pataduf. Jö shi pa sa tave sa fa Kilitu se sa ja tudu, se ëli se sa jamian tudu (3:11).

Se amea shi sa kutumu dëli, se Pelavöl ja da manten ba da nna nguë guëzha tudu ja faa ineñ ba toja utu tempu, fo pachi nna kitan ineñ shi sa ku ëli, se ëli ja pindji ineñ pa ineñ pachi jaata sai ku nna namain guëzha ineñ shi ku ja ta palea Laodisea (4:16).