Ja të liguilia olatuvëdji
4
Dajantu shi,
nna namain kilidu amu,
ku sa nna nguë ku amu ja dishia pa amu bë,
namsëdji se sa liguilia amu ku jölöiö amu,
namsëdji ja ska be dëtu ku Shiölö.
2 Se amu luga Evodia,
ku a shime Sintike,
pa ineñ jua amea shi pa ineñ sa gavu dantu Shiölö.
3 Se a shime bo,
amu luga bo,
jamada gavu tabaia,
amu pindji bo pa bo zhuda nna namain dösu ineñ sai,
pakë ineñ pezha lome amu ja pegua evanjelio,
zhuntadu ku Klemente ku nna utu nguë ku bi bi tabaia ku amu.
Namu dëneñ sa skividu bebezha pë dantu lavulu vida.
4 Namsëdji ja të liguilia olatuvëdji ku Shiölö.
Amu tan vlame faa namsëdji:
¡Ja të liguilia!
5 Pa nguë tudu ja jönsë namsëdji shimafan nna nguë ku kusan legadu.
Goleme Shiölö tan ske vlame bi.
6 Na ja sa tave zhugan jaf,
shina ja pindji Nashian ja tudu ku lezha,
ja ska pindji ëli jö ineñ shi ja fë namsëdji fata tudu ja ska da ëli dezhupaga.
7 Se sa amea shi Nashian ske da namsëdji padji,
ku se sa jö shi ngandji mashi ku uan nguë ja paadji tëndë;
se padji se ske fë lazhan kusan namsëdji ku tëndëmentu namsëdji amea Kilitu Djisu.
8 Pa jabamentu,
nna namain,
namsëdji ja ska mazhna jö ineñ shi ja sa ja vedadji,
jö ineñ shi sa ja dondolo,
jö ineñ shi ja sa ja dëtu,
jö ineñ shi ja sa ja shin noda,
jö ineñ shi ja sa ja kusan legadu,
jö ineñ shi ja sa ja dondolo pa leva.
Se jabamentu,
jö ineñ shi sa ja fumözhö ö ku ja mësë pa ja da gavu dëli,
jö ineñ sai se namsëdji ja ska mazhna.
9 Jö ineñ shi namsëdji shina fo amu,
ku namsëdji ma fo amu ku namsëdji tëndë,
jö ineñ sai se namsëdji ja fë,
se Nashian shi sa dji padji ske sa ku namsëdji.
Pelavöl da dezhupaga da zhuda djiëlu
10 Fë gavu da amu monchi muntë fo Shiölö amea se namsëdji tan ja vlame mazhna amu iai.
Amu na ngongo fa namsëdji kësë amuf,
shina namsëdji na bi sa ku fölöshö shi pa namsëdji zhuda amuf.
11 Amu na ja faa shi pakë amu sa ku dishamentuf,
pakë amu shina amea shi pa amu ja sa ku liguilia,
ja sa tadu shi amu ja sa.
12 Amu sëbë jö shi sa bibe dantu mavida,
ku a shime ku jö shi sa bibe ku batanchi.
Se amu shina pa amu sa deenchi djiskatudjia tudu,
ja sa fa amu sa ku batanchi ku pa amu ten sa ku faku,
ku pa amu të sovezha ku amu na ten të zhugan jaf.
13 Amu paadji sa deenchi ja tudu,
dezhupaga ku Kilitu ku ja da amu foshi.
14 Mandji se,
namsëdji fë ja gavu ja zhuda amu dantu mavida ineñ shi amu ma tudu.
15 Se namsëdji nna nguë guëzha palea Filipos,
namsëdji sëbë fa fo jomesa tabaia pegua evanjelio,
ta amu bi së fo vadji loso loso Masedonia,
zhugan guëzha na ma pachi pa zhuda amu ku pagu amea dishamentu amuf,
shina namsëdji moso.
16 **Pakë ba toja djia shi amu bi sa palea Tesalonika,
uan sapa ope se namsëdji da ja ba da amu dajantu dishamentu shi bi sa ku amu.
17 Na sa fa amu ska ma zhugan ja fo namsëdjif,
shina pa namsëdji tan ba të ja mashi deenchi Nashiolo.
18 Mandji se amu ma ja tudu;
se amu të batanchi;
amu sa shia,
ta amu ma fo Epafrodito jö ineñ shi ku namsëdji da bi da amu iai.
Sa uan ja ku sa ku sëlu ku ja saa gavu,
uan saklifisu ku Nashian ja da aen ku kusan legadu.
19 Dajantu shi,
Nashian amu ske da namsëdji jö ineñ shi ja fë namsëdji fata tudu,
amea gagavu gloria shi sa ku Kilitu Djisu.
20 ¡Ilö ku gloria da Nashian Pai no pa sempele ku pa sempele!
Amen.
Jabamentu manten
21 Namsëdji ja da nna nguë pövu santu Kilitu Djisu manten.
Nna namain ineñ shi sa iai ku amu da manten bi da namsëdji.
22 A shime nna nguë pövu santu ten da manten bi da namsëdji,
da manten mashi ba da nna nguë ineñ shi ja fë sulvisu dantu jadji Sesar.
23 Pa galasa Shiölö Djisukilitu sa ku spitu namsëdji.
Amen.