Jonfa Kilitu ku kusan tudu
3
Dajantu shi,
nna namain amu,
ja të liguilia tëjantu ku Shiölö.
Na sa zhugan fonta da amuf pa amu tan vlame skëvë jö ineñ shime da namsëdjif,
pakë sa ja ku ske fë namsëdji fata.
2 Namsëdji ja ska pinchidu nna «jösölö»,
nna nguë fëfëiu ineñ sai,
nna tabaiadölö fëfëiu,
nna nguë ineñ shi ja kote nguë öguë;
3 pakë no se sa nna nguë ineñ shi ja kuta nguë napai shishizhu,
nna nguë ineñ shi ja shivi Nashian ku zhuda Spitu Santu,
se no ja da ëli gloria dajantu no sa dji Kilitu Djisu,
se no na ja pë jonfa no da jö ineñ shi a ja fë ku foshi napaif.
4 Benga zha pa a shime amu ten të dëtu pa amu jonfa jö ineñ sai.
Zhugan nguë na ske të dëtu mashi ku amu pa jonfa jö ineñ sef:
5 *a kuta amu napai fo ötu djia ku a pali amu,
amu sa pövu nna nguë Israel,
nna nguë zhenchi Benjamin,
se amu sa ebreo ntëlelele.
Se tëjantu ku alë,
amu bi sa nna nguë pachidu nna fariseo;
6 *se tëjantu ku dishamentu ngandji fëfëiu amu,
se amu bi ska pëtëpë nna nguë guëzha;
se tëjantu ku djustishi alë se amu ja kumpli,
shin noda.
7 Mandji se jö ineñ se tudu,
ku tudjia bi sa ja ngandji da amu,
öseshi,
dajantu Kilitu,
se amu ja pia jö ineñ se tudu ja shipë shipë.
8 Sa vedadji fa,
amu na tan ja pia zhugan jö ineñ se shimafan ja ngandji mashi ku amea shi sa pa amu jönsë Kilitu Djisuf,
Shiölö amu.
Dajantu Kilitu se amu pëndë ja tudu,
se amu ja pia ja tudu shimafan iku valadji pa amu paadji ngana ëli,
9 ku pa amu sa zhuntadu ku ëli;
ku na sa djustishi amufa,
ku a ja të fo alëf,
shina ku djustishi ku a ja të fo jonfa shi amea Kilitu,
ku se sa i shi Nashian ja da nna nguë ineñ shi ja këlë dëli.
10 Jö shi amu ngongo ku ëli sa pa amu jönsë Kilitu,
pa amu sinchi dantu döguë amu pödë dëli shi tan lanta ëli bi vida,
ku pa amu ten sa zhuntadu ku padësë dëli,
ku pa amu ten mölë shimafan amea shi ku ëli mölë,
11 amu ske ja gada pa ten lanta amu bi vida fo dantu nna nguë mölë bebezha.
Ontolo no na sa da jamian shif
12 Amu na ngongo faa öma amu kë jö ineñ se tudu bebezhafa,
ñi pa amu faa kusan amu sa gavu bebezhaf,
mandji se amu ja ska be ku deenchi ja gada pa öma amu kë,
pakë Kilitu Djisu se ma amu pimëlu.
13 Nna namain amu,
amu na faa öma amu kë ja tudu bebezhaf,
jö shi amu ja fë sa fa amu ja ska kësë jö ineñ shi ja mdja tashi se amu ja ska fë foshi pa öma amu kë jö ineñ shi sa deenchi,
14 valadji pa amu ba da jamian shi ku pa amu ten ngana ja gavu dösë shi ku Nashian ja sama no pa no ba ma amea Kilitu Djisu.
15 Se sa jö shi;
no ineñ shi sa ku uan jonfa ödu,
ta pa no ja ska mazhna amea sai.
Se shi namsëdji tan ska mazhna utu ja patadu,
jö ineñ se tudu Nashian ten ske msa namsëdji.
16 Mandji se sa shi;
ske ta pa no ja ta ku amea jö ineñ shi öma no kë bebezha.
No sa nna nguë dösë
17 *Nna namain amu,
ja ska lë zhampulu amu,
pa namsëdji ten ska pia nna nguë ineñ shi ska bibe amea zhampulu shi ku no da namsëdji.
18 Pakë amu bi faa namsëdji uan sapa vëdji,
se öseshi se amu tan ska vlame faa namsëdji ku adöiö,
fa sa ku uan sapa nna nguë ku ska bibe shimafan nna namigu kusu Kilitu,
19 se jabamentu dëneñ sa fa ineñ sa pindjidu.
Se nashian dëneñ sa pa ineñ ja sa ku chipa shia,
se ineñ ja ska këlëdöguë dëneñ ku jö ineñ shi ta pa ja da ineñ govan iai.
Se jö ineñ shi moso ku ineñ ja ska mazhna sa ja mundu sai.
20 Mandji se no sa nna nguë sa ösë,
no ska gada pa Savadölö,
Shiölö Djisukilitu bi fo ösë,
21 pa se bi tuka öguë poto potodu no valadji pa sa shimafan tuludöguë öguë gloria dëli.
Se ëli ske fë amea pödë shi sa ku ëli valadji pa ja tudu sa basu dëli.