Ma kutumu Kilitu
2
Dajantu shi,
shi Kilitu se da namsëdji pödë pa ja da nguë añimu,
shi namsëdji ja manja uan nguë ku uan nguë ku ngongo,
shi nguë tudu ja të Spitu shime,
shi namsëdji ja të uan kusan ku ja të dölö,
2 ja fë pa amu ja sa shia liguilia ntëlelele,
ja sinchi jö shime,
ku ja sa zhuntadu ku ngongo,
amea kusan shime ku mazhnamentu shime.
3 Na ja fë zhugan ja pezhafa ö fëntëf,
shina pa ja sa masu masu,
ku pa uan nguë ja pia utu nguë mashi ku tuludöguë ëli.
4 Pa zhugan nguë na ja jua gavu döguë dëli mosof,
shina a shime gavu da nguë tudu.
Kilitu sa lantadu ba van
Benga zha,
pa ëli bi sa Nashiolo,
ëli na ma amea shime ku Nashian
shimafan uan ja pa ëli fala pëf,
7 shina ëli naga da jö shi bi sa ja dëli
se ëli ma öguë dëli shimafan sëlëva,
ja fë ja shimafan nna napai tudu
se msa öguë dëli shimafan uan napai shipë,
8 se shimafan napai,
se ëli kichi öguë dëli,
se ëli ten këlë Nashian ba toja mölë,
ba toja ku ëli mölë pë liba kusu.
9 Dajantu shi se Nashian da ëli ondolo shi ngandji mashi,
ku se ëli ten da ëli namu shi sa liba namu tudu
10 valadji pa,
deenchi namu sai ku a da Djisu iai,
pa özhöiö ja tudu ja mba,
nna nguë ineñ shi sa ösë,
tela ku basu dösan tela,
11 ku pa nguë tudu ja jonfesa fa Djisukilitu se sa Shiölö,
pa ja da Pai Nashian gloria.
Pa sa savasan shishizhu
12 Dajantu shi,
nna namain kilidu amu,
pa amea se namsëdji olatuvëdji ja tëndë amu,
pa na sa öshi amu bi sa dantu namsëdji mosofa,
pa namsëdji ja tëndë amu mashi öseshi ku amu sa löndji iai,
pa namsëdji ja fë lazhan savasan namsëdji ku mendu ku ondolo.
13 Pakë Nashian se sa nguë shi ja pë dantu namsëdji,
amea dishamentu gavu dëli,
pa namsëdji ja të ngongo ku a shime fidu kuzhu,
da vintadji gavu dëli.
14 Ja fë ja tudu shin ja lo nguë mali ku shin të tavadji,
15 valadji pa zhugan nguë na ja bë fo dantu namsëdji zhugan kupafa ñi zhugan fataf,
ku pa namsëdji sa nna mina Nashiolo shin noda metadji zhenchi fë ja fëfëiu ku ja masan masan.
Pa namsëdji dantu dëneñ ja ska chila blin shimafan ntëla dantu mundu,
16 pa namsëdji fala monova vida gavu,
valadji pa ta Kilitu ja bi,
pa amu fo sinchi gavu da namsëdji,
pa amu ba sëbë fa amu na jölë shipëfa ñi tabaia shipëf.
17 Se benga zha pa vida amu buka pë liba saklifisu ku sulvisu ku së fo jonfa namsëdji,
se ja fë gavu da amu se amu ja pachi liguilia se ku namsëdji tudu.
18 A shime namsëdji ten ja të liguilia,
ku pa namsëdji ten ja të pachi liguilia shi sa ku amu.
Pelavöl ska da gavu Timoteo
19 Ja jonfa Shiölö Djisu,
amu ska gada pa amu da Timoteo bi da namsëdji dandjian,
valadji pa amu ja të liguilia ta amu ja të nova namsëdji.
20 Pakë amu na tan të zhugan nguë ku ja pachi mazhnamentu dëli ku amuf ku anta vedadji ja ska lambela gagavu da namsëdjif.
21 Nna nguë tudu ja ska jua ja da öguë dëneñ,
ku na ja sa vintadji Djisukilitu.
22 Mandji se namsëdji tudu sëbë kutumu gavu Timoteo,
ku shimafan uan mina amu ku pai dëli se ëli shivi ku amu pa no pegua evanjelio.
23 Se amea sai se amu ja gada pa amu da ëli bi da namsëdji dandjian i shi moso amu ja jaba ku ja amu tudu.
24 Se amu ten jonfa Shiölö fa a shime amu goleme ten ske bi bë namsëdji.
Pelavöl ska da gavu Epafrodito
25 Se ten sa amea shime ku amu bë gavu fa pa amu tan da namain amu Epafrodito,
jamada tabaia ku pezha amu,
nguë shi namsëdji me da bi da amu pa zhuda amu,
da jö ineñ shi amu ja të dishamentu.
26 Ëli sa vintadji ngandji pa ëli bi bë namsëdji,
se ëli ten sa modoia pakë namsëdji bi sëbë fa ëli bi ska danchi.
27 Se bi sa vedadji faa ëli bi ska danchi,
ku bi fata uan fi kuzhu pa ëli mölë;
mandji se Nashian të mindjikodji da ëli,
se na sa da ëli mosofa,
shina ku a shime amu,
valadji pa amu na tan sa modoia mashi ku i shi sa ku amuf.
28 Dajantu shi se fë ku amu ska da ëli dandjian bi da namsëdji,
valadji pa namsëdji tan të liguilia ta namsëdji tan ja vlame bë ëli ku valadji pa amu na tan sa modoiaf.
29 Namsëdji ja ma ëli ku liguilia shimafan uan namain namsëdji dantu Shiölö,
pa namsëdji ten ja ngongo ku nna nguë ineñ shi tudu ja sa shimafan ëli,
30 pakë bi fata uan fi kuzhu pa ëli mölë dajantu ku ëli ska shivi Kilitu.
Se ëli pë vida dëli pepe mölë,
dajantu pa paadji të jö shi fë fata dantu sulvisu namsëdji tëjantu ku amu.