Palea Filipo bi sa uan palea ngandji dantu gövöndölö roma. Pelavöl bi ba palea sai ope vadji dëli shi bi fë dösu (Fidk 16:12-40), se ëli jomesa guëzha sai ja lambela öma betu dëneñ. Tuludöguë Pelavöl ten jönsë amea shi ineñ ten zhuda ëli ku djiëlu, dajantu shi se ëli ja da ineñ dezhupaga (4:10-18).

Tempu shi Pelavöl skëvë jaata sai, ëli bi sa djili (1:7-17), benga pa na bi sëbë jamian shi ëli bi saf, pakë ëli bi sa djili uan sapa ope dantu jamian pata patadu (Fidk 24:27; 28:16-31; 2Kor 11:23).

Epistola da nna nguë palea Filipos, zhuntadu ku i shi ëli bi da ba da Filemon iai, se sa ineñ shi sa dji tuludöguë dëli mashi ku no të fo apostol Pelavöl. Se a shime se ten sa i shi ja da lazhan liguilia ku dezhupaga: fo Pelavöl ba da nna nguë filipos, ku bi zhuda ineñ dantu uan tempu ödu da ëli; se fo nna nguë filipos ba da Pelavöl, ineñ ja da ëli dezhupaga dajantu tabaia shi ëli bi fë dantu ineñ iai.

Epistola sai ja kundji sinchimentu vivu ineñ shi ja sa ku nna pöjödölö valadji pa ja da nguë shina ja gagavu, dantu dëli a ja paadji dajonta ku shizhu ku shina ja gagavu dantu vida valadji pa nna kitan ku pa guëzha ten ja ska be ku deenchi fo pachi benda benda tudu. Pelavöl ja faa nna nguë filipos fa ëli ngongo ku ineñ monchi se ëli tan ngongo bë ineñ. Se ëli ja da ineñ añimu valadji pa ineñ ja jonfa Shiölö Djisukilitu ku pa ineñ ten ja bibe ku leva ja ngongo uan nguë ku utu nguë (2:3). Jaata sai ja da lazhan fa: Amu ja pindji namsëdji pa ja bibe uan vida dondolo, amea shi nova gavu Kilitu ja shina nguë (1:27).

Pelavöl ja jaba jaata sai ja da nna namain tudu manten, fo pachi nna kitan ineñ shi ku bi ska bai ku ëli se bi sa suguladu fa ineñ ten bi sa djili (4:21-22).