Nna pai ku nna mina
6
*Nna mina,
pa namsëdji ja tëndë amea Shiölö ku pai namsëdji,
pakë jö sai sa ja dëtu.
2 «Da pai bo ku main bo ondolo».
Se sa pimëlu mandamentu ku sa ku uan plomesa:
3 «valadji pa ja tudu be gavu ku bo ku pa bo ja ta uan vida löngö liba tela».
4 *Se namsëdji,
nna pai,
na ja fë pa nna mina namsëdji ja sa ku pashianf,
shina pa namsëdji ja ska kia ineñ jamangandji shi dëtu ku ja ska shina ineñ ja Shiölö.
Nna sëlëva ku nna shiölö
5 *Nna sëlëva,
pa namsëdji ja ska tëndë nna nguë ineñ shi sa shiölö namsëdji liba san tela iai.
Ja ska fë ku ondolo,
ku kichi öguë,
ku kusan betu,
shimafan ja namsëdji ska shivi Kilitu.
6 Ja ska shivi ineñ,
na sa öshi ineñ ja ska pia namsëdji mosof,
shimafan nna nguë ku ngongo ngana föböli fo nna pöjödölöf,
shina shimafan nna sëlëva Kilitu,
ja ska fë vintadji Nashiolo ku kusan tudu.
7 Ja ska fë tabaia namsëdji ku vintadji gavu,
shimafan uan sulvisu da Shiölö ku na ja sa da nna pöjödölöf.
8 Pakë ta pa namsëdji unian unian ja sëbë fa,
ja sa sëlëva ö nguë legadu,
fo Shiölö se ëli ske të ja sa jö shi ëli fë gavu iai.
9 *Se namsëdji nna shiölö,
ja ska fë ja gavu ku nna sëlëva namsëdji amea shime,
shin lonja öiö da ineñ.
Ja lambela fa fo namsëdji a shime ineñ tudu sa zhuntadu ku uan ponodu Shiölö soso ku sa ösë ku na ja pia uan nguë mashi ku utu nguëf.
Bitidu pezha shi Nashian ja da nguë
10 Se öseshi,
nna namain amu,
namsëdji jua pa Shiölö da namsëdji foshi fo pödë ödu dëli.
11 Pa namsëdji ja bishi ku bitidu pezha shi Nashian da namsëdji,
valadji pa namsëdji paadji ta mdjadu deenchi jö ineñ shi djiabu ja ska fë tëjantu ku namsëdji.
12 Pakë no na ska pezha ku pödë pöjödölöf,
shina ku spitu ku gövöndölö ja fëfëiu ineñ shi ja ta,
ku se sa ineñ shi të pödë ku odji liba mundu jamian kulu se ja ludja no iai.
13 Dajantu shi,
namsëdji ma bitidu pezha shi Nashian da namsëdji iai,
valadji pa namsëdji paadji ta mdjadu djia fëfëiu ineñ shi ske bi iai,
zha pa ta a ja sa vadu gavu,
pa namsëdji ta mdjadu.
14 Namsëdji ja ta mdjadu,
pa namsëdji bishi ku bitidu vedadji,
pa namsëdji ja fë lazhan öguë namsëdji ku ja kubili böjö kusan ku djustishi.
15 Pa ope namsëdji ja sa ku ja mëtëpope ku plesteñi da evanjelio padji.
16 Pa liba ja tudu,
pa namsëdji ja ma ja tapa öguë dji jonfa,
ku se ja sa jö shi a ja ma paka fesa fesa fögö djidjidu nguë shi fëiu.
17 Pa savasan ja sa bëtë shi ja tapa jasa namsëdji,
ku pa namsëdji ja ma jatana Spitu Santu,
ku sa Fa Nashiolo.
18 Pa namsëdji na ja chama lezhaf:
ja luga ja pindji Nashian olatuvëdji,
pa Spitu Santu ja ska msa namsëdji.
Pa namsëdji ja sa vatu,
shinke añimu fata namsëdji,
ku pa namsëdji ja ska lezha da nna pövu santu tudu.
19 Namsëdji ten ja lezha da amu,
valadji pa Nashian ja ska da amu faa ineñ shi pa amu ja ska fala,
valadji pa amu ja paadji faa fala ku valëntë pa amea se pa amu ja fë pa ja jönsë kumi ja Nashian shi sa dantu evanjelio.
20 Ku dajantu shi se Nashian da amu bi shimafan uan nguë ku ja fë sulvisu pa nova dëli ja ska be ja panta panta,
ku dajantu dëli se amu sa djili öseshi maladu ku guian.
Namsëdji ja ska lezha valadji pa amu ja faa fala da ëli shin mendu zhugan kuzhu.
Jabamentu manten
21 **Namain kilidu no Tikiko,
shividölö jonfadu tabaia Shiölö,
ëli ske da namsëdji lazhan ja tudu,
valadji pa namsëdji sëbë amea shi ja ska be ku amu,
ku jö shi amu ska fë.
22 Ku se amu ska da ëli bi da namsëdji,
valadji pa ëli da namsëdji monova no,
pa ku amea sai pa namsëdji ma añimu.