Ja ta amea shi Kilitu ngongo
5
Namsëdji shimafan nna mina kilidu Nashiolo,
ku ja ska lë ëli fë kuzhu.
2 Namsëdji ja nda ku ngongo,
shimafan ta Kilitu ten ngongo ku no,
se ëli da tuludöguë dëli dajantu no,
shimafan uan ja gavu ku ëli da no ku saklifisu da Nashiolo ku sëlu ku ja saa gavu.
3 Ta pa namsëdji ja fë ja gagavu shimafan dji nna nguë pövu santu:
ñi pa namsëdji na ja limian ja nda ölöluiafa ñi ja sunzhufa ñi dishia ja utu dji nguëf.
4 Na ja faa fala pözhölu pözhölufa,
ñi ja sono sonofa ñi ja dana danaduf,
pakë zhugan jö ineñ se na sa ja gavu da namsëdjif,
sa gavu mashi pa ja da Nashian dezhupaga.
5 Pakë namsëdji sëbë jö sai,
fa zhugan nguë ku ja fë ja nda ölöluia,
ku ten ja fë ja zhogoveadu,
jasu ku sa uan fidu ja adola nna nashian balu,
ëli na ske sa dantu gövöndölö Kilitufa ñi dji Nashianf.
Ja ta ku fögö djidjidu Kilitu
6 Pinchidu pa zhugan nguë na ja ngaña namsëdji ku faa sono sono,
pakë dajantu jö ineñ se tudu se uan jatigu ödu fo Nashian ske bi liba nna nguë ineñ shi na ja tëndë ëlif.
7 Dajantu shi,
namsëdji na ja ska zhunta ku ineñf.
8 Pakë tudjia namsëdji bi sa jamian kulu kulu,
mandji se öseshi se namsëdji sa fögö djidjidu ku Shiölö.
¡Namsëdji ja ska nda shimafan nna mina fögö djidjidu!
9 Pakë fögö djidjidu se ja sa jö shi ja fë no fë ja gagavu,
djustishi ku vedadji.
10 Ja ska golo olatuvëdji pa sëbë jö shi sa fë ja gavu da Shiölö.
11 Namsëdji na ja ska ma pachi fë ja fëfëiu dana danadu ineñ shi nna nguë ja ta jamian kuluf,
sa gavu mashi pa ja chila bi jamian fögö djidjidu.
12 Ja da nguë govan ta a ja da lazhan ja fëfëiu ineñ shi ineñ ja ska fë jöndjidu;
13 mandji se ta fögö djidjidu ja dëdë,
se ja tudu ja mdja betu,
amea shi ja sa limpi.
14 Pakë jö ineñ shi a ja pë deenchi jamian limpi,
ja sa deenchi fögö djidjidu.
Dajantu shi se a ja faa:
«Lanta,
bo shi ska djuni;
lanta fo dantu nna nguë mölë bebezha,
se Kilitu ske dëdë fögö djidjidu dëli pë bo».
15 Dajantu shi,
ja ska pinchidu ku amea shi namsëdji ja ska bibe.
Na ja ska bibe shimafan nna nguë danaduf,
shina ku tëndëmentu,
16 *ja ska ma tempu tudu,
pakë sa djia fëfëiu.
17 Na ja ska fë ja danadu danaduf,
shina ja ska jua kë i shi ja vintadji Shiölö.
18 Na ja ska beda ku vianf,
pakë jö ineñ se tudu ja ma nguë ba jamangandji buiadu,
sa gavu mashi pa namsëdji ja sa shia Spitu Santu.
19 *Ja ska da lazhan dantu namsëdji me ku salmos,
ku imno ku janta ineñ shi sa dji spitu,
ku pa ja janta da Shiölö ku ilö ku kusan namsëdji.
20 Ja da Nashian shi sa Pai dezhupaga da ja tudu a namu Shiölö no Djisukilitu.
Jö ineñ shi nna kitan ja fë
21 Pa namsëdji ja sa basu namsëdji me dajantu ondolo Kilitu.
22 *Nna miela,
namsëdji ja sa basu tuludöguë medu namsëdji,
amea shi a ja sa ku Shiölö.
23 Pakë medu se sa jasa miela,
ku se sa amea shi Kilitu se sa jasa guëzha,
ku se sa öguë dëli,
se ëli se sa Savadölö dëli.
24 Mandji se amea shi ku guëzha sa basu Kilitu,
se ten sa amea shime nna miela ten ta pa ineñ sa faladu ja tudu basu medu dëneñ.
25 *Nna medu,
ja ngongo ku nna miela namsëdji amea shi Kilitu ten ngongo ku guëzha ku ëli da vida dëli dajantu dëli.
26 Se sa jö shi ëli fë valadji pa ëli sa santu,
se ëli limpa ëli ku aua amea Fa Nashiolo,
27 valadji pa ëli msa öguë dëli me shimafan uan guëzha ku gloria shin noda ñi kili kilidu ñi utu ja patadu,
shina uan guëzha santu ku shin zhugan kupa.
28 Se ten sa amea shime ku nna medu ske ta pa ineñ ja ngongo ku miela dëneñ shimafan öguë dëneñ me.
Nguë shi ja ngongo ku miela dëli,
ëli ja ngongo ku tuludöguë dëli me.
29 Pakë zhugan nguë na ja të pashian tuludöguë dëli mef,
shina ëli ja da öguë dëli kumu se ëli ja fë lazhan döguë dëli,
shimafan amea shi Kilitu ten ja fë lazhan guëzha,
30 pakë guëzha se sa öguë dëli.
Se no ten sa pachi döguë dëli.
31 «Dajantu shi se napai ske ja lega pai dëli ku main dëli pë,
se ëli ja zhunta ku miela dëli,
se ineñ dödösu ske sa uan ponodu öguë soso».
32 Jö sai sa uan kumi ja ngandji fo Nashiolo.
Se sa jö shi amu ska da lazhan da Kilitu ku guëzha.
33 Dajantu jö ineñ sai,
pa unian unian namsëdji ja ngongo ku miela dëli shimafan tuludöguë dëli me,
pa miela ja da medu dëli ondolo.