Zhuntadu fë uan öguë soso ku Spitu Santu
4
Dajantu shi se amu sa djilima tëjantu ku Shiölö,
se amu pindji namsëdji pa namsëdji ja bibe shimafan nna nguë ineñ shi mësë ku Nashian se sama,
ku se sa amea shi a sama namsëdji,
2 *pa namsëdji olatuvëdji ja sa nna nguë levu,
gavu,
ku ja të pashiensa ku pa ja gaga uan nguë ku utu nguë ku ngongo.
3 Pa namsëdji ja fë foshi pa ja gada amea zhuntadu ku Spitu Santu,
dantu padji shi ja zhunta namsëdji.
4 Të uan ponodu öguë soso ku uan ponodu Spitu,
se sa amea shi Nashian sama namsëdji pa gada uan savasan soso.
5 Të uan ponodu Shiölö,
uan jonfa soso,
uan bachizha soso;
6 të uan ponodu Nashian ku Pai moso da nguë tudu,
se ëli sa liba nguë tudu,
ku nguë tudu ku amea nguë tudu.
7 Mandji se a da no tudu galasa amea mindjida shi Kilitu ja ngongo da no ja gagavu.
8 Dajantu shi,
se Fa Nashian ja faa:
«Ëli subili ba ösë,
se ëli ma nna nguë djili be ku ëli,
se ëli da nna napai tudu ja gagavu».
9 ¿A kë ja sa fa «ëli subili»?
Sa fa ëli pimëlu dësë ba basu dösan tela sai mashi.
10 Se nguë shi dësë ba basu se sa nguë shime ku tan vlame subili ba jamian shi atu mashi liba dösë,
valadji pë shia ösë tudu.
11 Se ëli me,
se lanta zhugan nguë pa sa apostol,
pa utu sa pantafala,
pa utu ja pegua evanjelio,
ku pa utu sa padjil ku meeth.
12 Pa amea se pa ëli va pövu santu da uan tabaia ku sulvisu,
valadji pa nna namain të foshi ku ineñ me valadji pa fë jadji,
ku se sa öguë Kilitu.
13 Ba toja pa nguë tudu sa zhuntadu basu uan jonfa shime ku pa ten jönsë Mina Nashiolo,
ku pa no ten ja fë ja uan nguë dëtu,
ku pa ba da mindjida shi atu ntëlelele Kilitu.
14 Valadji pa no na tan sa shimafan nna minaf,
ku pukulu domali ja ska zhuga no ba öluia ku oventu shina kuzhu;
se dajantu nna nguë fëfëiu ineñ shi ja ma ja pa ja ngaña nguë.
15 Mandji,
pa ja ska da vedadji ku ngongo,
se ja tudu ske ja këësë dantu no shimafan nguë shi se sa jasa,
ku se sa,
Kilitu.
16 *Ku se fo fidu ja dëli se öguë ntëlelele ja këësë se ja bai ja të foshi ku ngongo,
finkadu ku maladu pë fisu fisu tudu,
amea fidu ja pachi unian unian nguë.
Vida novu ku Kilitu
17 Jö sai,
se sa,
jö shi amu faa ku amu tan vlame faa namsëdji ku namu Shiölö:
pa namsëdji na tan ja bibe mashi shimafan nna nguë ineñ shi ku na ja jönsë Nashianfa ku ja bibe ku tëndëmentu shipë shipëf.
18 Ku ineñ ja sa ku tëndëmentu kulu kulu dëneñ,
se ineñ na ja sa tave vida shi ja fo Nashianf,
pakë ineñ ja sa buiadu dajantu kusan ödu dëneñ.
19 Se ineñ pëndë govan se ineñ da öguë dëneñ a kutumu fëfëiu,
se ineñ ja ska fë klase ja fëfëiu ku ja nozho nozhodu tudu.
20 Mandji se namsëdji na jönsë Kilitu pa namsëdji ja ta ku tadu sef,
21 pakë anta vedadji se namsëdji tëndë nova amea dëli se namsëdji shina pa ja ta ku tadu amea shi ëli ngongo ku ëli,
amea vedadji shi sa ku Djisu.
22 *Se tëjantu ku vida shi tudjia namsëdji bi ska bibe,
se a shina namsëdji pa ja chila bitidu veiu döguë tudjia pë san,
ku sa fende dajantu dishamentu ineñ shi ja ngaña nguë.
23 Pa namsëdji ja të spitu namsëdji të vla novu amea mazhnamentu namsëdji,
24 *ku pa namsëdji ja bishi bitidu döguë shi novu,
ku se a mindji ku fesan Nashiolo amea djustishi ku santu ku sa vedadji.
Kë amea tadu a ja ta öseshi
25 Dajantu shi,
na ta pa tan ja da fanchilaf,
shina pa namsëdji ja da nna pusumu namsëdji vedadji,
pakë no tudu sa pachi dantu öguë shime.
26 «Shi uan ja,
ja mëtë namsëdji pashian,
pa na ja të vla fë pekaduf».
Na ja lega,
pa pashian sai ja tada ba toja ta solo ja ska dauaf,
27 pakë pashian ja da djiabu fölöshö jamianf.
28 Nguë shi bi sa futadölö,
pa ëli na chama futa,
shina pa ëli ja tabaia,
pa ëli ja ma öma dëli fë ja gavu,
valadji pa ëli ja të ja pa ëli ja paadji da nna nguë ineñ shi na tëf.
29 Na ja ska faa ja fëfëiuf,
shina ja gagavu ku ja zhuda të foshi shi ku bo ja ta ku pa ten ja faa fala gagavu ku galasa da nna nguë ineñ shi ja ska tëndë bo.
30 Na ja fë pa Spitu Santu Nashian ja sa modoiaf,
ku se sa i shi a ma da sëiu pë namsëdji valadji pa namsëdji sa shimafan ja Nashiolo,
ta ske da djia shi nguë tudu ske sa legadu fo pekadu.
31 Namsëdji chama të kusan fëiu,
ma pashian,
mazhna fëiu,
lonja öiö da nguë,
mucha da nguë,
ku klase të pashian tudu.
32 *Anta pa sa jö ineñ sai,
pa namsëdji sa nna nguë ku kusan gavu ku ja të dölö dji nguë,
ja pada namsëdji ku namsëdji me,
amea shi Nashian ten pada namsëdji pekadu namsëdji amea Kilitu.