Jö shi Pelavöl ja fë dantu guëzha
3
Dajantu shi se amu,
Pelavöl,
djilima tëjantu ku Kilitu Djisu dajantu gavu namsëdji,
nna nguë ineñ shi na sa judiof.
2 Pakë se shi namsëdji tudu bi tëndë mötölö shi sa ku galasa Nashiolo ku ëli da amu pa da ba da namsëdji,
3 se fo uan suian öiö betu se fë ku ëli da amu pa amu jönsë kumi ja dëli,
amea shi amu bi skëvë uan fi kuzhu da namsëdji bebezha.
4 *Ta namsëdji ja ska lëë,
namsëdji ja paadji tëndë fa amu jönsë kumi jö shi Kilitu fë,
5 ku amea utu nna minadjimina na bi lega pa nna mina napai bi jönsëf,
shimafan öseshi ku ëli msa öguë dëli da nna santu santu apostol ku pantafala Nashiolo amea Spitu dëli.
6 Se kumi jö shi sa jö sai:
sa fa nna nguë ineñ shi na sa judiof sa nna nguë ineñ shi ske të gagavu ku nna nguë öguë shime,
ku ja ma pachi amea shime ku plomesa Kilitu Djisu amea evanjelio.
7 Se amu se a pë pa sa shividölö da evanjelio ku galasa shi Nashian da amu,
amea fidu ja pödë dëli.
8 Amu se kichi mashi ku nguë shi kichi mashi dantu nna nguë ineñ shi sa nguë pövu santu tudu;
mandji se ëli da amu galasa sai pa amu pegua da nna nguë ineñ shi na sa judiof nova gavu da ja gagavu Kilitu ineñ shi ku a na paadji jontaf.
9 Se a pë amu jasa pa amu fë nguë tudu jönsë kumplimentu plani Nashiolo,
kumi jö shi fo tempu tempu chindadji se bi sa jöndjidu ku Nashiolo,
ku se mindji ja tudu.
10 Valadji pa öseshi,
dajantu amea guëzha,
pödë ku foshi ösë tudu ba paadji jönsë tëndëmentu Nashiolo,
ku ja msa amea shi ëli sa pata patadu.
11 Nashian fë jö sai da amea shi ku se bi sa mazhnamentu pa sempele ku ëli fë ku Kilitu Djisu Shiölö no.
12 Se fo Kilitu se no sa legadu valadji pa no paadji iaba toja Nashiolo,
ku jonfa shi no të ku ëli.
13 Dajantu shi se amu pindji namsëdji pa namsëdji na pëndë añimufa dajantu padësë shi amu ska ma dajantu namsëdjif,
pakë jö ineñ se tudu sa gloria da namsëdji.
Lezha ku janta da Nashiolo
14 Dajantu shi se amu ja dajözhöiö deenchi Pai,
15 ku fo ëli se igui jadji tudu ja ma namu,
fo ösë a shime san tela.
16 Amu pindji pa Pai da namsëdji gagavu gloria dëli,
pa ëli da namsëdji foshi ku pödë dëli fo napai shi sa dantu kusan no amea Spitu dëli,
17 pa Kilitu bibe amea jonfa shi sa dantu kusan namsëdji ku pa ngongo se sa leezha ku fundamentu da vida namsëdji.
18 Ku pa se sa amea shi ja paadji tëndë ku pövu santu tudu kë i shi sa batela,
ku löngö,
ku atu ku fundu shi sa ngongo Kilitu.
19 Amu pindji,
pa namsëdji jönsë ngongo Kilitu,
ku se ngandji mashi ku jö ineñ shi no ja paadji jönsë tudu,
valadji pa namsëdji paadji sa shia ja tudu dantu Nashiolo.