Savasan fo galasa Nashiolo
2
*Se namsëdji tudu bi sa mölidu dajantu ja fëfëiu ku pekadu namsëdji,
2 ku namsëdji bi ska bibe tudjia amea pödë mundu sai,
namsëdji bi ska lë pödë gövöndölö jamian kulu kulu,
amea spitu shi ku öseshi ja sa liba nna mina na ja tëndë nguëf.
3 Se sa amea shi no tudu bi ska bibe tudjia,
ja lë dishamentu fëfëiu no,
ja fë vintadji öguë pöjödölö ku mazhnamentu döguë no,
se no ja sa nna mina pashian fo djia shi a pali no,
se no bi mësë jatigu ödu Nashiolo,
shimafan utu dji nguë.
4 Mandji se Nashian ku sa liku ku mindjikodji,
dajantu ngongo ngandji shi sa ku ëli se ëli ngongo ku no,
5 se ëli da no vida zhuntadu ku Kilitu öshi ontolo no bi sa mölidu dajantu pekadu,
se ëli da no vida.
¡Dajantu galasa dëli se namsëdji sa savadu!
6 Se zhuntadu ku Kilitu Djisu se ëli lanta no fo dantu nna nguë mölë bebezha,
se ëli fë pa no tusan zhuntadu ku ëli jamian dösë,
7 valadji pa ëli msa dantu tempu ineñ shi tan ska bi,
liku batanchi fo galasa dëli dantu gavu dëli liba no amea Kilitu Djisu.
8 Pakë dajantu galasa dëli se namsëdji sa savadu amea jonfa,
se jö se na sa ja fo nof,
shina sa ja Nashian se ja da.
9 Na sa ja fo fidu jö ineñ shi no ja fëfa,
valadji pa zhugan nguë na ja këlëdöguë dëlif.
10 Pakë sa ja Nashian se sa nguë shi fë no fidu ja ku ëli mindji fo Kilitu Djisu,
valadji pa no ja fë fidu ja gagavu,
ku se Nashiolo bi bi fë vadu da no fo tompu tompu valadji pa no ja fë.
No jözhë ja pë amea kusu
11 Dajantu shi,
namsëdji ja ska lambela fa tudjia namsëdji,
bi sa nna nguë ineñ shi na sa judiof fo djia shi a pali ineñf.
A shime nna nguë ineñ shi ineñ a ja sama «nna nguë ku napai dëneñ na sa kutaduf» pakë dajantu shi se fë a ja sama namsëdji «nna nguë ku napai dëneñ ja sa kutadu»,
ku se a ja fë ku öma nna pöjödölö.
12 Namsëdji ja lambela fa tudjia namsëdji bi sa safadu fo tela Israel shin Kilitu,
se namsëdji na ten bi sa ku pachi dantu bechi ñi plomesa Nashianf.
Namsëdji bi ska bibe mundu sai shin Nashiolo shin gada zhugan kuzhu.
13 Mandji se öseshi,
zhuntadu ku Kilitu Djisu se namsëdji ineñ shi tudjia bi sa löndji se ëli ma namsëdji bi peetu amea sangui Kilitu.
14 Pakë Kilitu se sa padji no.
Ëli se fë fo nna judio ku fo nna nguë ineñ shi na sa judiof tudu uan pövu soso amea öguë dëli,
se ëli të ögö budu namigu shi bi ska safa no iai të lolo.
15 *Se ëli bolo alë shi ku bi sa mandamentu ku jö ineñ shi pa fë,
se ëli mindji fo pachi dödösu uan pövu gavu novu,
se amea sai se ëli fë padji.
16 *Se amea kusu se Nashiolo tan jözhë ja tudu pë ja fë pövu dödösu uan ponodu öguë soso.
Ja mata namigu shi bi sa dantu pövu amea kusu sai.
17 Se ëli bi pegua nova gavu padji bi da nguë tudu,
da namsëdji ineñ shi ku bi sa löndji da Nashiolo ku ineñ shi bi sa peetu.
18 Pakë dajantu amea Kilitu,
se nna judio ku a shime nna nguë ineñ shi na sa judiof paadji iaba toja Pai amea Spitu shime.
19 Dajantu shi,
se namsëdji na tan sa nna nguë utu telafa ñi nna nguë fo tela pataduf,
shina nna nguë tela santu,
ku nna nguë igui jadji Nashiolo.
20 Namsëdji tudu sa shimafan uan jadji lantadu pë liba uan fundamentu ku sa nna apostol ku nna pantafala,
ku tuludöguë Kilitu Djisu se sa budu shi se mashi.
21 Se fo Kilitu,
se jadji se tudu ja bai ja lanta jamian tudu ku pachi tudu,
ba toja pa ëli padji sa uan jadji santu fo Shiölö.
22 Se fo ëli me,
se namsëdji ja sa fidu zhuntadu pa ja fë uan jadji santu pa Nashiolo ja ta amea Spitu dëli.