EPISTOLA KU SAN PELAVÖL SKËVË DA NNA NGUË
EFESO
Manten
1
*Pelavöl,
apostol Djisukilitu ku se sa vintadji Nashiolo,
da nna nguë ineñ shi ja ta palea Efeso manten ku sa nna pövu santu ku jonfa shi se sa ku nna namain zhuntadu ineñ shi sa ku Kilitu Djisu.
2 Pa Nashian Pai no ku Shiölö Djisukilitu ta galasa ku padji dëneñ pë liba namsëdji.
Pelavöl da Nashian ilö da fidu ja dëli
3 Besa ja sa ku Nashiolo ku Pai Shiölö no Djisukilitu,
ku se da no besa ku klase besa spitu no tudu dantu jamian dösë tudu ku Kilitu.
4 Pakë Nashian se bi ma no da Kilitu anta pa ëli mindji mundu,
valadji pa no sa santu shin kupa deenchi dëli.
Da ngongo dëli,
5 se ëli bi fë no pa no sa nna mina dëli amea Djisukilitu,
da amea shi ëli ngongo ku vintadji dëli.
6 Se ëli fë jö ineñ sai valadji pa no ja da Nashian ilö olatuvëdji da galasa gavu shi ëli gavu,
ku se sa amea shi ëli da no fo Mina kilidu dëli.
7 *Ku se sa nguë shi amea sangui dëli,
se no ja sa legadu,
padadu pekadu tudu,
amea liku shi fo galasa dëli,
8 ku se fë ku të tëndëmentu ku shizhu batanchi.
9 Se ëli fë pa no jönsë kumi jö ineñ shi sa vintadji dëli tudu.
Se ëli fo gavu dëli se ëli mazhna pa ëli fë jö sai amea Kilitu,
10 se ëli zhunta ja tudu ku Kilitu,
pa fë pa kumpli tabaia mötölö dantu tempu tempu,
ku jö ineñ shi sa ösë ku a shime ten ja ta san tela.
11 Fo Kilitu,
se Nashian bi bi ma no fo tempu baezha valadji pa no djogo gavu dëli,
amea jö ineñ shi tuludöguë Nashian ja ngongo,
ku jö ineñ shi ëli ja fë tudu ja sa amea kumi vintadji dëli.
12 Valadji pa no nna judio sa nna nguë pimëlu pimëlu ku ja gada Kilitu,
valadji pa nguë tudu ja da ëli ilö ku gloria pödë dëli.
13 Se fo ëli se a shime namsëdji,
ku bi tëndë nova vedadji bebezha,
evanjelio shi ja sava no,
ku ta namsëdji këlë dëli,
se a da sëiu ku Spitu Santu shi ëli bi plomëtë iai.
14 Se Spitu sai se ja msa amea shi Nashian ske kumpli jö ineñ shi ëli plomëtë,
ta ëli ske fë pa pövu shi ku ëli ma tudu sa legadu,
valadji pa nguë tudu da ëli ilö da pödë dëli.
Lezha da nna namain
15 Dajantu shi se amu,
fo djia shi amu tëndë jonfa shi sa ku namsëdji tëjantu ku Shiölö Djisu ku ngongo shi ku namsëdji ja msa ku nna nguë pövu santu tudu,
16 amu na sa chama da Nashian dezhupaga da namsëdjif,
ja lambela namsëdji dantu lezha amu.
17 Amu pindji Nashian dji Shiölö no Djisukilitu,
Pai shi sa ku gloria,
pa ëli da namsëdji spitu tëndëmentu ku dji msa nguë kuzhu,
valadji pa namsëdji fo jönsë ëli gavu mashi.
18 Amu pindji pa Nashian dëdë fögö pë öiö kusan namsëdji,
valadji pa namsëdji sëbë jö shi nna nguë ineñ shi ëli se sama ku alagada sai,
ku gavu gloria dëli ku se sa gagavu shi Nashian da pövu santu.
19 Pödë Nashian se ngandji mashi ku utu pödë,
ku se sa i shi ja zhuda pa no nna namain ja këlë.
Se pödë sai se sa pödë shime ku Nashian msa ku foshi dëli,
ngandji ku ödu dëli,
20 ta ëli tan lanta Kilitu fo dantu nna nguë mölë bebezha se a pë ëli tusan benda dëtu dëli jamian dösë,
21 ja pë ëli liba pödë tudu,
odji,
ku gövöndölö ku shiölö,
se ëli sa liba namu ineñ shi a ja ma lezha,
na sa tempu se mosofa shina tempu shi tan ske bi bi.
22 *Se Nashian ma ja tudu se ëli pë basu dope dëli,
se ëli da guëzha pa se sa jasa ja tudu.
23 Pakë guëzha se sa öguë dëli,
ku fo ëli se ja ma pödë,
pakë ëli se sa nguë shi ja shia ja tudu gola gola.