Palea Efeso bi sa uan palea ineñ shi ngandji mashi dantu gövöndölö roma. Pelavöl bi ba palea sai ope dösu. Se ope shi fë dösu se ëli mdja ala dösu anu ku uan fi tempu mashi (Fidk 18:19-21; 19:1–20:1).

Epistola da nna nguë efeso sa uan jaata ku shina ja ngangandji ku pa ja shina nguë, se ja msa fa nguë shi skëvë jaata sai bi ska pë fundamentu shina kuzhu ku dji nna padjil. Nna balë Kilitu palea sai bi sa ku jonfa monchi, mandji se ineñ bi ma uan sapa mavida dantu vida kitan dëneñ (Apo 2:1-3), dajantu shi se Pelavöl bi bë gavu fa bi fata pa ëli da ineñ lazhan zhugan ja jö ineñ shi pa ineñ shina. Pelavöl ten ja msa ineñ pödë ngandji Nashiolo, ku a ja msa fo ta Djisu tan lanta bi vida fo dantu mölë (1:19-20), ku se a pë liba jö ineñ shi ja sa tudu (1:21-23). A shime ëli ten ja msa ineñ fa jonfa dëneñ ku Kilitu na sa dajantu amea ja gavu dëneñf, shina sa ja Nashiolo se da ineñ dödji limpi pepepe (2:8).

Sa uan ja pa ja mazhna tëjantu ku guëzha, ku pa ja pia shimafan öguë Kilitu (1:22-23; 4:15-16; Kol 1:18). Pelavöl ja pia ono sai amea shi uan medu ku miela dëli shimafan i shi ten ja të Kilitu ku guëzha dëli, ku ëli ja ngongo ku ëli ku ba toja ku ëli da vida dëli (5:21-29). Se ëli ten ja da lazhan gavu shi ta uan pai ja të ku nna mina dëli, ku dji nna shiölö ku nna sëlëva, ja msa ineñ fa Nashiolo se sa Shiölö ineñ tudu (6:1-9).

Jaata sai ja jaba ku uan shina ja tanjadu tëjantu ku savasan shi Nashiolo ja da nna pekadölö ku ja sa shimafan dji pingada uan sodadji ku vadu ja uan kitan (6:14-17). Se jabamentu, se Pelavöl ja da nna namain palea Efeso manten ja luga Nashian ku Djisukilitu da ineñ (6:23-24).